Read Boros Dusun JABUR 51 Bible Online

JABUR 51 - Boros Dusun bible

JABUR 51

¹Pikeun pamingpin biduan. Jabur Daud.

²Waktu ditegor ku Nabi Natan lantaran jinah jeung Batseba.

³Nun Allah, sing hawatos ka abdi, demi satia asih Gusti. Pupus dosa abdi, demi Gusti teh maha kurnia.

⁴Seuseuh sagala kajahatan abdi, beresihkeun abdi tina ieu dosa!

⁵Abdi teh rumaos lepat, kadorakaan abdi tansah jadi emutan.

⁶Abdi rumaos, dosa teh estu ka Gusti, ka Gusti pisan, gaduh lampah anu ku Gusti dianggap dosa. Gusti ngahukum ka abdi pantes, hukuman ka abdi adil, merenah.

⁷Ti awit dilahirkeun oge abdi teh parantos doraka, dosa ti lebet kandungan keneh.

⁸Anu dipundut ku Gusti nya eta jujur sareng bener; pinuhan hate abdi ku hikmah Gusti.

⁹Angkat ieu dosa abdi, supados abdi beresih, abdi kumbah, supados langkung bodas manan salju.

¹⁰Ridoan abdi nguping sora kabungah sareng kasuka supados tiasa deui ngarasa bagja, sanaos ku Gusti parantos disasaak sareng diririkes.

¹¹Peureumkeun soca Gusti, tong ningali dosa abdi, sadaya kajahatan abdi mugi dipupus.

¹²Ciptakeun di diri abdi hate anu beresih, nun Allah, eusian abdi ku sumanget anyar, jiwa satia.

¹³Abdi ulah dipiceun ti payuneun Gusti, roh Gusti anu suci ulah dicandak ti abdi.

¹⁴Pasihan deui kagumbiraan ku kasalametan ti Gusti, sareng paparin kadaek nurut ka Gusti.

¹⁵Engke abdi bade ngajarkeun parentah Gusti ka nu daroraka, sina tarobat ka Gusti.

¹⁶Raksa nyawa abdi, nun Allah, abdi salametkeun. Kaadilan Gusti tangtos ku abdi dibewarakeun kalayan gumbira.

¹⁷Tulungan abdi nyanggem, nun PANGERAN, sangkan muji-muji ka Gusti.

¹⁸Gusti teu hoyong kurban peuncitan, atanapi dihaturanan kurban beuleuman, eta oge Gusti teu hoyong.

¹⁹Abdi ngurbankeun hate anu pinuh ku karumasaan, nun Allah! Gusti tangtos moal nolak hate anu rumasa sareng tobat.

²⁰Sing hawatos ka Sion, tulungan, kuta Yerusalem mugi sina ngadeg deui.

²¹Saparantos kitu tangtos Gusti kersa nampi kurban anu layak, kurban beuleuman, sareng sapi jalu, anu dikurbankeun dina altar Gusti.