Read Boros Dusun JABUR 59 Bible Online

JABUR 59 - Boros Dusun bible

JABUR 59

¹Pikeun pamingpin biduan. Nurutkeun lagu: Ulah ngabasmi. Jabur ti Daud, basa bumina dikepung ku Saul maksudna rek ditelasan.

²Nun Allah, leupaskeun abdi ti musuh, salametkeun ti anu keur ngarah!

³Luputkeun ti ieu para jahanam, jalmi-jalmi tukang maehan!

⁴Maranehna keur ngadaragoan, bade maehan ka abdi, eta nu jarahat teh sakait ngarah abdi. Sanes ku margi abdi gaduh dosa atanapi kalepatan,

⁵sanes ku margi abdi awon kalakuan pang maranehna paciweuh kitu.

⁶Nun GUSTI, Allah Nu Maha Kawasa, enggal abdi tulungan. Tingalian ku Gusti, nun Allah Israil! Hukum eta jalmi-jalmi tuna Allah teh, nu harianat kitu tong dipikawelas.

⁷Wengina maranehna daratang deui, ngaprak kota bari tingharereng cara anjing.

⁸Dangukeun susumbarna, ucap-ucapanana matak raheut lir pedang, panyangkana moal aya nu ngadengeeun.

⁹Nanging ku Gusti mah eta teh digumujengkeun, eta jalmi-jalmi tuna Allah teh ku Gusti dipoyok.

¹⁰Abdi ngandel kana kakiatan Gusti, nya Gusti nu jadi panyalindungan abdi.

¹¹Allah anu nyaaheun ka kaula tangtu nyumpingan, kaula bakal disina nenjo musuh eleh.

¹²Eta musuh teh ulah dipaehan, nun Allah, bilih bangsa abdi parohoeun. Paburencaykeun, elehkeun ku kakiatan Gusti, nun PANGERAN, panyalindungan abdi sadaya!

¹³Ku margi sungutna jahat, biwirna doraka, mugi sing karingkus ku adigungna! Maranehna sok sasapa, sok nipu.

¹⁴Mugi amuk ku amarah Gusti, sing tumpur lebur, sangkan karasaeun yen Allah teh murba di Israil, malah ngereh satangkaraking jagat.

¹⁵Wengina maranehna daratang deui, ngaprak kota bari tingharereng cara anjing,

¹⁶sapertos anjing ngaprak nareangan hakaneun, ari ngan manggih saeutik babaung.

¹⁷Dupi abdi mah sumeja ngidungkeun karosaan Gusti, unggal isuk bade muji satia asih Gusti. Gusti parantos kersa jadi panyalindungan, sareng panyaluuhan waktos abdi keur rupek.

¹⁸Abdi muji ka Gusti, nun Pangraksa abdi! Panyalindungan abdi teh Allah, Allah nu asih ka abdi.