Read Boros Dusun JABUR 64 Bible Online

JABUR 64 - Boros Dusun bible

JABUR 64

¹Pikeun pamingpin biduan. Jabur Daud.

²Nun Allah, dangukeun paneda abdi anu keur kasesahan! Abdi teh sieun musuh. Salametkeun nyawa abdi.

³Amankeun abdi ti nu garaduh niat jahat, tina amarah para jahanam.

⁴Maranehna ngasah letahna seukeut kawas pedang, mesat-mesatkeun omonganana anu garihal lir jamparing.

⁵Maranehna karesit nyebarkeun bohong, taya kaera, nyilakakeun jalmi anu balener ku carana anu kecing.

⁶Maranehna silih hatean ngararancang kajahatanana. Silih bejaan di mana neundeun pitapakna. Aromongna, ”Buni, moal kaciri.”

⁷Maranehna nyarieun picilakaeun batur, sarta kieu aromongna, ”Alus, sampurna ieu rarancang urang teh.” Hate jeung pikiran manusa teh buni, teu bisa diteuleuman.

⁸Tapi jamparing Allah tingbelesat ka maranehna. Maranehna ujug-ujug taratu.

⁹Ku Allah disina cilaka ku ucap-ucapanana sorangan; sakur anu nyaraksian bati gogodeg.

¹⁰Maranehna bakal galimir, bakal mikiran anu geus dipidamel ku Allah, tuluy nguar-nguar padamelana-Na.

¹¹Jalma anu balalener barungah ku sagala padamelan PANGERAN, maranehna tangtu aman nyalindung ka Mantenna; jalma-jalma nu balageur bakal maruji ka Mantenna.