Read Boros Dusun JABUR 66 Bible Online

JABUR 66 - Boros Dusun bible

JABUR 66

¹Pikeun pamingpin biduan. Jabur. Lagu. Surak sing gerah, he umat kabeh, puji Allah!

²Sanggakeun pupujian, agungkeun jenengana-Na, baktikeun pamuji ka Mantenna!

³Unjukkeun ka Allah, ”Padamelan Gusti kalintang ahengna. Kakawasaan Gusti teu kinten rosana, dugi ka musuh-musuh Gusti ngareluk sarieuneun.

⁴Satangkaraking jagat sami sumembah, ngaragungkeun ka Gusti, ngaragungkeun jenengan Gusti.”

⁵Ka darieu, saksian dadamelan Allah, saksian kaahengan dadamelana-Na di manusa.

⁶Laut disalin rupa jadi daratan, bisa dipake leumpang ku karuhun urang, dipeuntasan. Padamelan Mantenna estu matak bungah.

⁷Mantenna nyangking parentah salalanggengna, sabab kawasa, soca-Na nitenan bangsa-bangsa. Pacuan aya nu wani baha.

⁸Puji Allah kami, he sakumna bangsa, sing kadenge mujina.

⁹Mantenna geus ngaraksa jiwa-jiwa kami. Kami kabeh teu diantep sina ragrag.

¹⁰Nun Allah, abdi-abdi ku Gusti parantos diuji, sapertos perak dibesot ku seuneu. Leres, ku Gusti parantos diuji.

¹¹Ku Gusti diantep tigebrus kana burang, punduk dibugbrugan momotan.

¹²Ku Gusti diantep diidek-idek ku musuh, diantep ditempuh ku seuneu sareng ku caah. Nanging ayeuna parantos dicandak ka tempat anu aman.

¹³Abdi bade ka gedong Gusti nyanggakeun kurban beuleuman, kangge nekanan jangji ka Gusti.

¹⁴Bade ngabuktoskeun anu diikrarkeun kapungkur waktos keur nyorang tunggara.

¹⁵Bade ngahaturkeun domba, dibeuleum dina altar, ngurbankeun sapi jalu sareng embe, haseupna sina mumbul ka langit.

¹⁶Ka darieu reungeukeun, he sakur anu ajrih ka Allah, kaula rek nyaritakeun pitulung Mantenna ka kaula.

¹⁷Bareto kaula ngajerit menta tulung ka Mantenna, ayeuna kaula ngagungkeun ku pupujian.

¹⁸Lamun seug kaula henteu eling tina dosa, PANGERAN moal kersaeun ngadangu.

¹⁹Tapi Allah memang geus ngadangu ka kaula, panyambat kaula geus dimakbul.

²⁰Sagala puji ka Allah, reh paneda kaula henteu ditolak sarta henteu ngowelkeun satia asih-Na ka kaula.