Read Boros Dusun JABUR 7 Bible Online

JABUR 7 - Boros Dusun bible

JABUR 7

¹Tangis Daud ku karana Kus, urang Binyamin; dinyanyikeun ka PANGERAN.

²Nun PANGERAN, Allah abdi, abdi nyuhunkeun diraksa, luputkeun, salametkeun, leupaskeun ti nu ngudag-ngudag.

³Ulah dugi ka maranehna lir singa ngagusur abdi, sarta abdi henteu aya nu nulungan, tangtos abdi disasaak.

⁴Nun PANGERAN, Allah abdi, upami abdi jahat upami kantos nipu babaturan upami kejem ka musuh tanpa lantaran, upami kantos ngalampahkeun anu sarupi kitu,

⁶sawios musuh sina nguber-nguber sarta abdi kacerek, sawios abdi sina ditigas, dipaehan, mayit abdi diantep ngalumbuk dina taneuh.

⁷Gedurkeun amarah, nun PANGERAN! Musuh abdi anu ngamuk teh ayonan enggal singkil, abdi belaan, apan Gusti meredih kaadilan.

⁸Kempelkeun bangsa-bangsa sina ngariung ka Gusti, kawasaan ku Gusti ti sawarga.

⁹Gusti ngahakiman umat manusa, abdi nyuhunkeun kaadilan, nun PANGERAN; Gusti uninga yen abdi teu salah.

¹⁰Gusti teh Allah nu adil, anu nilik pikiran jeung karep manusa. Eureunkeun kagorengan jalma jahat, ganjar jalmi anu balener.

¹¹Allah teh panyalindungan kaula, anu nyalametkeun jalma nu nurut ka Mantenna.

¹²Allah teh Hakim nu adil, anu salawasna ngahukum jelema jahat.

¹³Lamun maranehna teu daraek tobat, Allah baris ngasah pedang-Na. Mantenna ngawengkang gondewa tinggal ngalepas,

¹⁴nyepeng pakarang nu matih ngecengkeun panah nu hurung.

¹⁵Titenan, kumaha si jahat ngulik kajahatan, ngararancang huru-hara, ngajalankeun tipu daya.

¹⁶Tapi pitapak beunangna masang keur batur keunana ka maranehna sorangan.

¹⁷Kajuliganana malindes kana dirina, cilaka ku katelengesanana sorangan.

¹⁸Kaula muji sukur reh PANGERAN teh adil, kaula ngamulyakeun jenengana-Na Nu Maha Agung.