Read Boros Dusun JABUR 72 Bible Online

JABUR 72 - Boros Dusun bible

JABUR 72

¹Ti Suleman. Nun Allah, wulangkeun hukum Gusti ka raja kaadilan Gusti paparinkeun ka anjeunna,

²supados adil ngurusna ka umat Gusti, sangkan leres ngurusna ka nu sangsara.

³Mugia nagri makmur santosa sareng sing nyumiratkeun kaadilan.

⁴Sang raja mugia rumaksa ka nu balangsak, bumela ka nu walurat, sareng numpes tukang nindes.

⁵Sapanjang panonpoe sareng bulan gumelar, umat sing turun-tumurun ngesto ka Gusti.

⁶Mugia raja teh sing saibarat hujan nyiram lahan-lahan, lir ngijih nyiraman bumi.

⁷Sapanjang jumenengna muga mekar kaadilan, muga makmur sapanjangna, tinanding umurna bulan.

⁸Karajaanana sing murba ti laut ka laut, ti Eprat dugi ka tungtung jagat.

⁹Urang gurun keusik masing tunduk ka anjeunna, musuh-musuhna masing sarujud.

¹⁰Raja-raja Sepanyol sareng anu ti pulo-pulo, sing carunduk nyaranggakeun pangabakti, raja-raja Arab sareng Etiopia caraos upeti.

¹¹Raja-raja sadayana bakal dareku ka anjeunna, bangsa-bangsa sadayana sami kumawula.

¹²Anjeunna rumawat ka nu walurat, anu nyambat ka anjeunna; nyaah ka nu balangsak, jeung nu kalantar.

¹³Asih ka nu miskin, nyaah ka nu lemah nangtayungan hirupna anu sangsara.

¹⁴Maranehna diluputkeun tina panggencet jeung katelengesan, nyawa maranehna ku raja dianggap mulya!

¹⁵Dirgahayu raja! Sing disebaan emas ti tanah Arab, sing pada ngadoakeun salilana, sing dirahmat ku Allah sapapanjangna!

¹⁶Mugia nagri pinuh ku gandum, pasir-pasirna kaamparan pepelakan, laleubeut buahanana kawas anu di Libanon. Kota-kotana masing gegek ku jelema, lir tegal pinuh ku jukut.

¹⁷jenenganana sing tetep kawangi-wangi, kawentar mashur sapanjang surya gumelar. Mugia sakumna bangsa marenta diberkahan ku Allah, cara ngaberkahan ka raja.

¹⁸Puji PANGERAN Allahna Israil! Ngan Mantenna nyalira anu ngadamel saniskara mujijat.

¹⁹Puji jenengana-Na nu agung, salalanggengna! Kamulyaan Mantenna sing minuhan jagat. Amin! Amin!

²⁰Kitu ungel panutup paneda-paneda Daud putra Isai.