Read Boros Dusun JABUR 73 Bible Online

JABUR 73 - Boros Dusun bible

JABUR 73

¹Jabur Asap. Sabenerna, Allah teh nyaah ka Israel, nyaah ka sakur nu beresih hate.

²Tapi kaula kungsi bingbang kana hal eta, kapercayaan meh luntur,

³lantaran kaula teh panas ka nu karumaki, dumeh nu daroraka teh sararenang hirupna.

⁴Tara katarajang ku kanyeri, awakna karuat, sarehat.

⁵Tara meunang papait cara nu sejen, tara meunang kasusah cara nu rea.

⁶Kasombonganana lir geus ngongkorong, katelengesanana enggeus ngabaju,

⁷hatena mudalkeun kadorakaan, pikiranana pinuh ku niat jahat.

⁸Resep nyeungseurikeun batur, ucapna jarahat, takabur jeung resep ngagencet batur.

⁹Maranehna ngahujat Allah di sawarga gede rahul ka manusa di bumi.

¹⁰Ku hal eta, umat Allah ge jadi bariluk, ngarandeleun kana caritaan maranehna.

¹¹Majar, ”Moal kauninga ku Allah, moal katohyan ku Nu Maha Agung.”

¹²Kitu kaayaanana eta anu daroraka teh, hirupna sarenang, malah beuki baleunghar.

¹³Jadi percumah kaula hirup beresih, teu guna ngajauhan dosa oge.

¹⁴Nun Allah, sadinten jeput Gusti nyangsara abdi, unggal enjing Gusti nyiksa.

¹⁵Nanging upami abdi nyanggem kitu, atuh sanes jadi umat Gusti deui.

¹⁶Nu mawi eta teh sok haben dipikiran, nanging sualna abot teuing keur abdi mah.

¹⁷Tungtungna abdi asup ka Bait Gusti, nembe ngartos bakal kumaha engkena eta nu jarahat teh.

¹⁸Maranehna baris ditempatkeun di nu laleueur, sina lalabuh carilaka.

¹⁹Ku Gusti ditumpur sakedat netra, kitu tungtung panganggeusanana, pikagimireun.

²⁰Sapertos impian, bray isuk teh buyar; barang Gusti cengkat, les maranehna musna.

²¹Waktos keur ngarasa jengkel sareng hate asa karerab,

²²harita abdi teh bodo sapertos sato, tina teu ngartos ku Gusti.

²³Mung saena abdi tetep montel ka Gusti, sarta leungeun abdi ku Gusti dicepeng.

²⁴Ku Gusti ditungtun dinasehatan sangkan ahirna tiasa ditampi kalayan hormat.

²⁵Saha deui kagaduh abdi di sawarga, kajabi Gusti? Di dunya ge hoyong naon deui, da parantos gaduh Gusti.

²⁶Najan jiwa raga abdi lemah, nanging Allah anu jadi kakiatan abdi. Anu dipikabutuh ku abdi salalamina mung Gusti.

²⁷Sing saha anu ninggalkeun Gusti, tangtos cilaka. Sing saha anu teu satia ka Gusti, ku Gusti baris dibasmi.

²⁸Jadi keur kaula mah raket ka Allah teh kacida hadena; ka PANGERAN Nu Maha Agung kaula seja nyalindung sarta ngawartakeun sagala padamelana-Na.