Read Boros Dusun JABUR 76 Bible Online

JABUR 76 - Boros Dusun bible

JABUR 76

¹Pikeun pamingpin biduan. Dipirig ku kacapi. Jabur anggitan Asap. Pupujian.

²Allah kamashur di Yuda, jenengana-Na dimulyakeun di Israil.

³Mantenna kagungan tempat di Yerusalem, sarta jumeneng-Na di Gunung Sion.

⁴Di dinya Mantenna ngaririkes panah-panah musuh, tameng jeung pedang, cindekna sakabeh parabot perangna.

⁵Kalintang agungna Gusti teh, nun Allah! Estu mulya Gusti mulih ti pagunungan tas ngelehkeun musuh.

⁶Baladna anu garagah parantos dirangsadan, parantos harees moal harudang deui, kagagahan sareng kaahlian perangna taya pedahna.

⁷Barang ku Gusti dihaok, nun Allahna Yakub, kuda sareng anu tarumpakna maraot tingjarungkel.

⁸Gusti dipikagimir ku sadayana, nun PANGERAN, ana Gusti parantos bendu, taya nu tagen nyanghareupan.

⁹Gusti ngumumkeun putusan hukum ti sawarga, bumi ngeleper, jep jempling,

¹⁰waktos Gusti ngadeg bade ngumumkeun putusan hukum, yen bade ngajait anu digencet di bumi.

¹¹Jalmi-jalmi bengis ge ka Gusti maruji; anu saralamet tina perang marilu mestakeun Gusti.

¹²Geura tedunan jangji maraneh ka PANGERAN, Allah maraneh. Sanggakeun pangabakti ka Mantenna, he bangsa-bangsa nu dareukeut! Allah teh pikagimireun manusa.

¹³Anak-anak raja nu aradigung ku Mantenna diteundeutkeun, raja-raja gede disina galimireun.