Read Boros Dusun JABUR 77 Bible Online

JABUR 77 - Boros Dusun bible

JABUR 77

¹Pikeun pamingpin biduan. Make lagu Yedutun. Jabur Asap.

²Kaula sasambat tarik ka Allah sasambat tarik pisan, seug kadangueun.

³Dina waktu sumpeg, kaula neneda ka Pangeran, sapeupeuting neneda namprakkeun leungeun, tapi hate teu daek paler.

⁴Ari inget ka Allah, kaula ngarenghap, ari keur tapakur hate ngarasa lesu.

⁵Sapeupeuting kaula ku Mantenna disina nyaring. Kacida bingungna nepi ka teu kecet-kecet.

⁶Inget ka poe-poe nu geus kaliwat, inget ka taun-taun anu geus kalarung;

⁷sapeupeuting mikir jero, bari ngaheneng seug nanya maneh:

⁸”Rek terus bae kitu PANGERAN teh nampik, teu kersa nyoreang deui?

⁹Geus teu mikanyaah deui? Geus lesot tina jangji-Na?

¹⁰Naha geus lali kitu Allah teh kana welas asih? Naha bendu, nepi ka teu kersaeun mikawelas?”

¹¹Heug bae kaula ngomong kieu, ”Ieu anu pangpikanyerieunana — Allah geus teu kawasa deui.”

¹²Abdi bade ngemut-ngemut karya Gusti nu aragung, nun PANGERAN, bade ngeling-ngeling mujijat-mujijat Gusti kapungkur.

¹³Abdi bade mikiran sagala padamelan Gusti sareng ngalenyepan karya-karya Gusti anu harebat.

¹⁴Nun Allah, padamelan Gusti sadayana suci. Teu aya deui nu agung sapertos Gusti.

¹⁵Nya Gusti pisan Allah teh, nu kawasa midamel mujijat-mujijat, kakawasaan Gusti kagurnita ka bangsa-bangsa.

¹⁶Gusti digjaya ngajait umat, turunan Yakub sareng Yusup.

¹⁷Cai ngadegdeg barang ningal ka Gusti, kacida sieuneunana, nun Allah, dasar sagara mingsir gimireun.

¹⁸Mega-mega ngucurkeun hujan, gelap tingbeledag di langit, kilat sasamber ka ditu ka dieu.

¹⁹Guludug tinggeleger tinggulugur, kilat-kilatna nyaangan jagat, bumi ngageter ngadegdeg.

²⁰Gusti angkat napak ombak, laut dipeuntasan, nanging tapak Gusti ngadampal henteu katara.

²¹Gusti nuyun ka umat lir hiji pangangon, ku perantawis Musa sareng Harun.