Read Boros Dusun JABUR 86 Bible Online

JABUR 86 - Boros Dusun bible

JABUR 86

¹Panyambatna Daud. Nun PANGERAN, mugi dangukeun, mugia kabul ieu paneda, abdi teh balangsak sareng walurat;

²mugi raksa nyawa abdi, jalmi nu satia ka Gusti, mugi ieu abdi Gusti anu kumureb teh jait.

³Mugi aya kurnia, nun Allah Panutan, anu ku abdi disambat sadidinten.

⁴Paparin kabungah ieu abdi Gusti teh, reh ka Gusti mumbulna paneda abdi.

⁵Reh Gusti teh langsar manah, jembar hampura, murah asih ka sugri nu sok sasambat.

⁶Mugi dangukeun paneda abdi, nun PANGERAN, ieu panyambat mugia dimakbul.

⁷Saban mendak pakewuh, nya ka Gusti abdi ngalengis, da tangtos Gusti kersa ngamakbul.

⁸Taya ilah nu sapertos Gusti, nun PANGERAN, taya nu mampuh nyieun hal sapertos nu ku Gusti dipidamel.

⁹Bangsa-bangsa sadayana, kenging Gusti ngagelarkeun, tangtos darongkap, dareku di payuneun, bakal maruji kaagungan Gusti.

¹⁰Rehing Gusti teh agung, kawasa ngadamel mujijat, mung Gusti nyalira Allah teh.

¹¹Wurukan, abdi teh kedah kumaha, nun PANGERAN, tangtos ku abdi ditumutkeun kalayan satia, kumaha kedahna ngabdi ka Gusti kalayan satuhu.

¹²Abdi seja muji ka Gusti sabuleud hate, nun PANGERAN Allah abdi, seja ngabewarakeun kaagungan Gusti sapapaosna.

¹³Kalintang ageungna satia asih Gusti ka abdi, dugi ka nyawa abdi dijait ti jero kubur!

¹⁴Abdi dikurubut ku nu arangkuh, nun Allah; diarah bade dipaehan ku sabubuhan jelema telenges, jalmi-jalmi anu henteu malire ka Gusti.

¹⁵Nanging Gusti teh Allah anu sipat rahman rahim, langsar manah, leber kaasih, satia tuhu.

¹⁶Mugi abdi katampi, neda jembar piwelas-Na, kiatkeun, salametkeun, margi sapertos pun biang, abdi oge bakti teh ka Gusti.

¹⁷Abdi Gusti mugi dipaparin tanda kasaean Gusti, supados anu ngarewaeun ka abdi areraeun naringal abdi ditulung sareng dililipur ku Gusti.