Read Boros Dusun JABUR 88 Bible Online

JABUR 88 - Boros Dusun bible

JABUR 88

¹Lagu. Jabur golongan Korah. Pikeun pamingpin biduan. Nurutkeun lagu: Mahalat Leanot. Lagu atikan ti Heman, urang Esrah.

²Nun GUSTI Allah, jurusalamet abdi, ari siang abdi sasambat, ari wengi dumeuheus ka payuneun Gusti.

³Mugi ieu paneda teh dangukeun, dangukeun panyambat abdi nyuhunkeun tulung!

⁴Abdi diambreg ku rupi-rupi pakewuh, ajal parantos nyantong,

⁵sapertos nu sanes-sanes anu parantos meh maot, parantos taya tangan pangawasa.

⁶Abdi ditinggalkeun di nu paraeh, sapertos nu dipaehan, ngalonjor di jero kuburan maranehna, anu ku Gusti hamo diemut-emut deui, parantos di luareun pitulung Gusti.

⁷Abdi ku Gusti digebruskeun ka jero liang kubur, liang anu pangpoekna sareng pangjerona.

⁸Amarah Gusti nindihan kacida abotna, abdi remuk dilindes ku panekana.

⁹Babaturan abdi ku Gusti sina nyalingkir, abdi ku Gusti didamel pikageuleuheun maranehna. Abdi kakepung, taya petana kaluar.

¹⁰Panon ceuleuyeu teu kiat ku sangsara. Sadidinten abdi sasambat ka Gusti, leungeun tumamprak neda pitulung.

¹¹Gusti teh bade midamel mujijat ka nu parantos maraot? Tiasaeun mayit lugay teras mumuji ka Gusti?

¹²Naha kaasih Gusti sok diomongkeun di jero kubur? Naha kasatiaan Gusti sok dicarioskeun di tempat kabinasaan?

¹³Naha tiasa katingal mujijat-mujijat Gusti di nu poek, kitu deui kasaean Gusti di tanah nu leungit tina emutan?

¹⁴Nun PANGERAN, abdi ngalengis nyambat pitulung, saban enjing neneda ka Gusti.

¹⁵Naon margina abdi disieuhkeun, nun PANGERAN, naon margina Gusti ngabalieur ti abdi?

¹⁶Ti ngongora abdi teh diriripuh dugi ka mehmehan maot, parantos cape nadahan hukuman ti Gusti.

¹⁷Haben dilindes ku amarah Gusti anu ngentab-ngentab, binasa jadi tadah panyiksa Gusti.

¹⁸Sadinten jeput sapertos diteumbragan ku caah, ambreg ti unggal sisi.

¹⁹Sobat-sobat nu pangdalitna ge naringgalkeun, nu maturan teh mung poek.