Read Boros Dusun JABUR 9 Bible Online

JABUR 9 - Boros Dusun bible

JABUR 9

¹Pikeun pamingpin biduan. Nurutkeun lagu Mut Laben. Jabur Daud.

²Kalayan hate mantep, nun PANGERAN, abdi sumeja muji ka Gusti, sareng seja ngamashurkeun padamelan Gusti anu araheng.

³Ku karana Gusti, abdi bingah sumeja nyanyi. Sumeja nyanyi muji ka Gusti, nun Allah Nu Maha Kawasa.

⁴Musuh-musuh abdi bubar birat barang naringal Gusti tembong, tingjarungkel paraeh.

⁵Gusti ngahukum kalawan adil tur jujur, parantos ngabelaan perkawis abdi.

⁶Gusti parantos ngahukum bangsa-bangsa nu jarahat parantos dibasmi, moal aya nu nginget-nginget deui.

⁷Musuh-musuh parantos musna sapapaosna, kota-kotana ku Gusti parantos diancurkeun, moal aya deui nu mikaeling.

⁸Demi PANGERAN mah raja salalanggengna, tahta pangadilana-Na geus nanjeur.

⁹Anjeunna marentah dunya kalayan adil, ngahakiman bangsa-bangsa ku kaadilan.

¹⁰PANGERAN teh pananggeuhan keur sakur nu ditindes, panyalindungan dina mangsa susah.

¹¹Anu tarerang ka Gusti, nun PANGERAN, bakal ngaharep ka Gusti, sugri anu marek ku Gusti tara ditolak.

¹²Sanggakeun puji ka PANGERAN, anu marentah di Sion! Mashurkeun padamelana-Na ka sakumna bangsa-bangsa!

¹³Allah emut ka nu sangsara, henteu lali kana panyambatna, sareng ngahukuman jalma-jalma nu nyiksa ka maranehna.

¹⁴Duh PANGERAN, mugi aya piwelas! Tingali talajak musuh anu nyangsara ka abdi! Nun PANGERAN, jait abdi tina ajal.

¹⁵Supados abdi tiasa nangtung hareupeun urang Yerusalem, nembongkeun kabungah parantos disalametkeun ku Gusti.

¹⁶Bangsa-bangsa nyarieun lombang, maranehna anu tigebrus, beunang ku pitapakna sorangan.

¹⁷PANGERAN ngebrehkeun anjeun ku putusan hukum-Na nu adil, nu daroraka teh cilaka ku polahna sorangan.

¹⁸Nya paeh bagian nu jarahat mah, bagian jelema anu narolak ka Allah.

¹⁹Nu balangsak moal salilana diantep; moal salilana pangarep-ngarep nu laip disina remuk.

²⁰Sumping, nun PANGERAN! Tong diantep manusa sombong ka Gusti! Kempelkeun maranehna ka payuneun, umumkeun hukumanana.

²¹Sina sarieuneun, nun PANGERAN, sina ngarasaeun yen manehna teh saukur manusa.