Read Boros Dusun JABUR 90 Bible Online

JABUR 90 - Boros Dusun bible

JABUR 90

¹Paneda Musa, abdi Allah. Nun PANGERAN, Gusti teh salamina jadi panyalindungan abdi sadaya.

²Memeh Gusti ngajadikeun gunung-gunung, memeh bumi sareng alam dunya ku Gusti dicipta, Gusti parantos jumeneng Allah nu langgeng sareng baris teras jumeneng salalanggengna.

³Gusti ngedahkeun manusa mulang ka asal, ku Gusti dijadikeun deui lebu.

⁴Kangge Gusti mah sarebu taun sami sareng sadinten, saumur dinten kamari anu parantos liwat, lir hiji saʼat anu pondok wanci wengi.

⁵Umur jalmi ku Gusti disina nyeot lir palid ku caah, teu langkung panjang ti saimpian. Sapertos jujukutan, enjing-enjing marentik,

⁶jaradi sareng karembangan, sorena gararing teras paraeh.

⁷Abdi-abdi musna ku bebendu Gusti, sami sumeblak ku duduka Gusti.

⁸Dosa abdi-abdi disina nembrak di payuneun Gusti, sanaos buni ku Gusti mah katingali.

⁹Hirup abdi-abdi jadi pondok, diteukteuk ku bebendu Gusti, umur sirna ibarat napas sarenghap.

¹⁰Lamina umur abdi-abdi mung tujuh puluh taun, atanapi dalapan puluh pikeun nu kiat, kitu ge bari ripuh seueur nu karasa, hirup sakedap, teras sirna.

¹¹Saha nu parantos ngarasa karongkahan mudalna bebendu Gusti? Saha nu sadar kumaha matak gimirna balukar tina duduka Gusti?

¹²Elingkeun abdi sadaya yen hirup teh kacida pondokna, supados jadi jalmi wijaksana.

¹³Sabaraha deui lamina Gusti bendu teh? Sing hawatos ka sadaya kawula Gusti.

¹⁴Tembongkeun kaasih Gusti ka abdi sadaya unggal enjing, supados hirup abdi-abdi tiasa ngarasa bagja.

¹⁵Paparinan kagenahan, saimbang sareng kaprihatinan anu dikeunakeun ka abdi sadaya salami nyorang kalaraan.

¹⁶Ebrehkeun padamelan Gusti anu rongkah ka abdi-abdi, ebrehkeun pangawasa Gusti anu mulya ka turunan abdi sadaya.

¹⁷Paparinkeun rahmat Gusti, nun PANGERAN, Allah abdi sadaya! Langsarkeun sugri pagawean abdi sadaya!