Read Boros Dusun SILOKA 13 Bible Online

SILOKA 13 - Boros Dusun bible

SILOKA 13

¹Budak bageur, ari dipapatahan ku bapana teh nurut. Ari nu gede hulu mah dipepelingan teh embung.

²Jalma hade saucap-ucapna nguntungkeun, ari tukang tipu mah malah resep kana kakerasan.

³Ngomong masing ati-ati, hirup kudu dijaga. Nu ngomongna gagabah baris tijungkel.

⁴Pangedulan sanajan loba kahayang ge moal laksana, sabalikna nu getol, sagala kahayangna tangtu kahontal.

⁵Jalma jujur ngewa kana bohong, ari nu jahat mah saucap-ucapna teh ngerakeun jeung pikaijideun.

⁶Kayaktian teh ngaraksa ka nu teu salah. Ari kajahatan mah ngadatangkeun kacilakaan ka nu daroraka.

⁷Aya nu akon-akon beunghar padahal taya kaboga. Aya oge anu pura-pura miskin padahal beunghar.

⁸Anu beunghar, duitna teh dipake keur ngajaga kasalametanana. Sabalikna jiwa nu miskin mah moal aya nu ngarah.

⁹Jelema bener ibarat cahaya ngagebray, jelema jahat mah ibarat lampu melempem rek pareum.

¹⁰Sipat angkuh nungtun kana pisusaheun. Jadi jalma mah ulah sungkan menta luang.

¹¹Banda mah beuki gampang dialana, beuki gampang beakna. Beuki wekel ngalana, beuki nambahan lobana.

¹²Estu nalangsa lamun pangharepan gagal, sabalikna ana kahayang laksana, hate pinuh ku bagja.

¹³Nolak nasehat, eta teh menta kasusah. Nurut kana nasehat tangtu mulus.

¹⁴Piwulang ti nu budiman, ibarat cinyusu ngaburial terus, bisa jadi jalan pisalameteun tina bahaya.

¹⁵Akal budi ngajungjung darajat, ari jelema anu sok cidra mah anggur tumpur.

¹⁶Jalma anu sehat akal, sagala lampahna dipikir ti samemehna. Ari nu gejul mah sok tuluy nangarkeun kagejulanana.

¹⁷Utusan anu teu beunang dipercaya matak nyilakakeun. Utusan anu satuhu mah ngalantarankeun rapih.

¹⁸Nu embung diajar bakal malarat tur taya harkat. Nu daek nampa panggeuing mah bakal diajenan.

¹⁹Kacida untungna lamun kahayang bisa laksana. Jalma gejul mah arembung babalik pikir.

²⁰Pek nyampur jeung nu pinter, tangtu pinter. Pek babaturan jeung nu garejul, tangtu ancur.

²¹Di mana-mana ge nu doraka mah dikukuntit ku picilakaeun. Sabalikna nu balener mah baris meunang ganjaran.

²²Jalma hade bisa ngawariskeun kakayaanana ka incu-incu. Sabalikna harta banda jelema jahat mah baris ragrag ka jalma anu balener.

²³Tanah nganggur bisa ngahasilkeun dahareun pirang-pirang keur nulung anu mariskin. Tapi ku jelema jahat mah dicarek, teu meunang dikebonan.

²⁴Nu tara ngawarah anak tandaning teu nyaah. Mun enya nyaah ka anak tangtu daek ngelingan.

²⁵Jalma bener moal kurang dahareun, sabalikna jalma jahat mah salawasna lapareun bae.