Read Boros Dusun SILOKA 14 Bible Online

SILOKA 14 - Boros Dusun bible

SILOKA 14

¹Awewe binangkit ngamumule rumah tanggana. Sabalikna awewe gejul mah ngabaruntakkeun.

²Kudu jujur tandaning ngesto ka PANGERAN. Mun teu jujur, tandaning teu sieun ku Mantenna.

³Jalma gejul mah sok muji maneh bawaning ku sombong-sombongna. Sabalikna anu berbudi, karaksa ku omonganana.

⁴Mun euweuh sato keur narik wuluku, leuit teh bakal kosong. Mun aya mah tangtu pinuh.

⁵Saksi anu beunang dipercaya, nu dicaritakeunana teh tangtu bener. Saksi palsu mah pangakuanana bohong kabeh.

⁶Tukang cacawad mah moal bisa bijaksana. Ari nu ngarti mah babari diajarna.

⁷Nu burung mah jauhan bae, da moal bisa ngajarkeun naon-naon ka urang.

⁸Naon sababna jelema pinter wet bijaksana? Sabab nyaho kana pilampaheun dirina. Naon sababna jelema bodo wet gejul? Sabab pangrasana mah sagala nyaho.

⁹Nu barurung tara mikiran dosana. Jelema anu harade mah hayang dihampura.

¹⁰Suka keur sorangan, duka keur sorangan, batur mah mo bisa milu ngarasakeun.

¹¹Waktu imah jelema jahat diruksak, imah jelema bener mah tetep nagen.

¹²Aya jalan anu disangka pisalameteun, padahal brasna kana pipaeheun.

¹³Seuri teh sok dipake nyumputkeun kasedih. Ari enggeusna mah angger-angger bae susah.

¹⁴Jalma goreng baris tinemu jeung kagorengan. Jalma hade baris meunang pahla tina kahadeanana.

¹⁵Jalma bodo mah percayaan, ari nu binangkit mah ngawas-ngawas heula pilengkaheun.

¹⁶Jelema nu boga pikiran mah sok ati-ati sangkan luput tina kasusah. Ari nu bodo mah sok lalawora jeung sologoto.

¹⁷Anu babarian napsu lampahna sok siga nu burung, da jelema bijaksana mah adatna teh leuleuy.

¹⁸Jalma nu taya kanyaho, temahna bodo. Ari nu bijaksana mah diganjar pangarti.

¹⁹Jalma jahat baris ngeluk hareupeun jelema bener bari tamada menta dipikarunya.

²⁰Ka nu malarat mah taya pisan nu misobat, teu cara nu beunghar loba sobatna.

²¹Mun hayang ngarasa bagja, kudu karunya ka anu balangsak. Mikangewa ka batur teh dosa.

²²Mun urang migawe hade, baris dihormat jeung dipercaya. Pohara kaliruna migawe nu goreng mah.

²³Mun hayang nyapek kudu ngoprek, da ari ngobrol bae mah pimalarateun.

²⁴Jalma bijaksana dipuji ku kabijaksanaanana, jalma gejul kaceluk ku kagejulanana.

²⁵Lamun carita saksi sayakti, bisa ngajait tina pati. Lamun caritana bohong eta mah hianat.

²⁶Sieun ku PANGERAN teh matak teger jeung reugreug ka urang sakulawarga.

²⁷Sieun ku PANGERAN teh dadasarna hirup, anu bisa ngajauhkeun tina ancaman pati.

²⁸Agungna raja gumantung kana jumlah rahayatna, tanpa rahayat raja ge taya hartina.

²⁹Jelema anu tahan sabar nandakeun bijaksana, sabalikna nu gede ambek mah nandakeun kacida bodona.

³⁰Hate sugema matak hurip kana diri, sirik dengki mah ibarat panyakit matak paeh.

³¹Ngagencet ka nu miskin, eta teh ngunghak ka Allah nu ngadamelna. Welas asih ka nu miskin, eta teh hiji bakti ka Mantenna.

³²Jalma jahat baris ragrag ku kajahatanana, jalma bener bakal karaksa ku kajujuranana.

³³Jelema nu boga pangarti, sagala pikiranana dibarengan ku akal budi. Jelema gejul mah tuna tina akal budi.

³⁴Bangsa anu nyekel bebeneran baris jaya. Lamun bangsa nyieun dosa, tangtu bakal nista.

³⁵Pagawe nu parigel bakal kapake ku rajana. Pagawe anu nguciwakeun manahna mah bakal dihukum.