Read Boros Dusun SILOKA 17 Bible Online

SILOKA 17 - Boros Dusun bible

SILOKA 17

¹Mending dahar sangu bear tapi hate tengtrem, ti batan kadaharan nu ngareunah di imah anu pinuh ku kasusah.

²Badega anu binangkit bisa ngelehkeun anak dunungan nu tanpa guna. Malah bisa kabagi warisan sagala.

³Emas jeung perak diujina ku seuneu. Ari hate jelema mah diujina ku PANGERAN.

⁴Jalma jahat ngaguguna kana pikiran jahat, tukang bohong kana bohong.

⁵Ngulinkeun nu miskin sarua jeung ngulinkeun PANGERAN nu ngadamelna. Ulah atoh nenjo batur nu goreng milik, bisi kahukum.

⁶Nu geus karolot sok agul ku incu-incu, cara barudak sok agul ku bapana.

⁷Jelema nu lantip budi nyaritana moal bohong, jeung pamohalan pisan jelema gejul nyarita aya eusina.

⁸Aya jalma anu nganggap, yen panyogok teh matih, sagala ge ku eta mah leeh.

⁹Mun hayang dipikaresep, kudu daek ngahampura batur nu salah ka urang. Ngunek-ngunek bae kana kasalahanana mah keur nyobat ge bisa pegat.

¹⁰Panegor sakali ge ku jalma berbudi mah leuwih karasaeun mangpaʼatna, ti batan jalma bodo digebugan ratusan kali.

¹¹Ka jalma jahat anu salawasna nyieun onar, pati teh datangna lir utusan nu kejem.

¹²Aya saleuheung amprok jeung biruang anu karampas anakna, ti batan tepung jeung anu burung nu pipikiranana gejul.

¹³Males goreng ka nu hade, balukarna kagorengan teh bakal nyayang di imah.

¹⁴Awal pasendatan, ibarat mimiti bocorna hiji bendungan. Memeh bedah kudu geuwat diomean.

¹⁵Nyalahkeun jelema beresih, atawa ngaleupaskeun jelema jahat, duanana ge kaceuceub PANGERAN.

¹⁶Ngongkosan nu gejul sangkan dididik euweuh hadena, da puguh teu bogaeun pikiran sehat.

¹⁷Sobat salawasna sok nembongkeun kanyaahna. Ari dulur pikeun naon mun lain keur silih tulungan dina kasusah?

¹⁸Anu sasanggupanan mangmayarkeun hutang tatangga mah, ngan jelema anu teu boga pikiran.

¹⁹Jalma nu resep kana masiat, resep pasea, jalma anu osok nyombong bae, neangan pipaseaeun.

²⁰Gindi pikir jeung goreng biwir, ngan cilaka bagianana, moal meunang kahadean.

²¹Pikeun nu jadi bapa mah lamun anakna milampah kagejulan, taya lian ti matak nalangsa.

²²Gumbira teh matak sehat. Nguluwut bae mah matak gering nangtung.

²³Hakim anu piduit, ririkipan daek disogok, kaadilan mah teu dijalankeun.

²⁴Jelema anu asak luangna, nu diulik teh lampah nu bijaksana. Ari anu atah luangna mah sok kumaha bae karepna.

²⁵Anak gejul, ka bapa matak susah, ka indung matak nalangsa.

²⁶Henteu pantes ngadengda jelema anu henteu salah. Henteu pantes ngahukum jelema bageur.

²⁷Jalma nu yakin kana dirina, tara ngomong sagawayah. Jelema bijaksana mah ayem.

²⁸Nu gejul ge ari repeh jeung sungutna kuateun balem mah sok disangka bijaksana.