Read Boros Dusun SILOKA 19 Bible Online

SILOKA 19 - Boros Dusun bible

SILOKA 19

¹Miskin oge ari jujur mah leuheung, ti batan nya gede bohong nya gejul.

²Sumanget ngagegedur ge ari bari jeung euweuh pangarti mah jang naon. Tur ari gurunggusuh teh sok matak nyusahkeun maneh.

³Aya jalma nu cilaka ku lantaran kalakuanana anu bodo, tapi neumbleuhkeun ka PANGERAN.

⁴Nu beunghar mah babari meunang sobat-sobat anyar. Ari nu malarat mah sobat nu aya ge sok nungtutan areuweuh.

⁵Ngabohong di pangadilan tinangtu dihukum, hamo bisa luput.

⁶Sasaha ge ku jelema penting mah hayang kaaku, ku nu balabah hayang dipisobat.

⁷Keur nu miskin mah boga dulur ge sarua jeung henteu. Komo sobat mah sakumaha hayangna ge moal boga.

⁸Kudu daek diajar sabisa-bisa, ciri yen nyaah ka diri, seug ingetkeun beubeunangan diajar teh, tangtu bagja.

⁹Nu ngabohong di pangadilan moal aya anu luput tina hukuman, pasti binasa.

¹⁰Nu barodo mah teu pantes hirup mewah. Kitu deui jalma beulian pimanaeun pantes marentah ka pangagung.

¹¹Jalma anu asak sasar mah sok bisa mengkek amarah. Lamun urang digogoreng tapi ku urang teu ditolih, estu mulya kacida.

¹²Amarah raja ibarat gaurna singa. Sabalikna kurniana mah ibarat hujan beunang hayang.

¹³Anak bodo bisa matak ancur bapana. Pamajikan nu cerewed ibarat cai nyakclakan teu eureun-eureun.

¹⁴Imah jeung harta bisa diwaris ti kolot. Ari nu iasa maparin bojo binangkit mah ngan PANGERAN.

¹⁵Rek kedul pek, rek hees bae pek, moal teu kalaparan.

¹⁶Turutkeun papagon Allah tangtu maneh panjang umur; mun dilalaworakeun, tangtu maneh paeh.

¹⁷Barang bere ka nu miskin ibarat nginjeumkeun ka PANGERAN. Mantenna nu baris ngabalesna.

¹⁸Warah anak teh sangkan nurut ti lelembut, diajar ti bubudak. Mun diantep, sasat urang keneh anu nyilakakeun engkena.

¹⁹Jalma anu gede ambek mah antep sina ngarasakeun balukarna. Ditulungan sakali engke teh menta deui menta deui.

²⁰Denge nu mere nasehat, sing daek mulungan luang, tangtu baris boga pangabisa.

²¹Manusa ngareka itu jeung ieu, ari jadi henteuna mah kumaha kersa PANGERAN.

²²Jalma hawek mah pikasebeleun. Saleuheung nu miskin ti batan nu gede bohong.

²³Masing iman ka PANGERAN sangkan panjang umur, reugreug moal meunang bahla.

²⁴Aya jelema anu ku kedul-kedulna, nepi ka hoream ngahuap.

²⁵Nu angkuh kudu dihukum, geusan pangajaran ka jalma anu teu nyaho pisan ka nu hade. Ku jalma berbudi mah panggeuing teh dijieun piluangeun.

²⁶Anu nganyenyeri ka bapa atawa nundung ka indung, estu jelema doraka, teu boga rasa rumasa.

²⁷Anaking, mun maneh geus embung deui diajar, ka anu geus beunang ti heula ge bakal gancang poho.

²⁸Lamun saksi geus niat rek ngagebruskeun, hamo aya kaadilan. Jelema jahat mah kana kagorengan teh pohara beukina.

²⁹Tukang popoyok mah tangtu meunang hukuman, nu garejul pasti meunang pangrangket.