Read Boros Dusun SILOKA 2 Bible Online

SILOKA 2 - Boros Dusun bible

SILOKA 2

¹Regepkeun anaking, ieu Bapa rek papatah. Poma ulah mopohokeun nu ku Bapa diucapkeun.

²Sakur nu jadi piwuruk, lenyepkeun sarta hartikeun.

³Enya, kudu nunuhun menta kanyaho, kudu neda-neda menta pangarti.

⁴Pek kotektak mangka gemet, lir neangan perak atawa pependeman.

⁵Lamun eta dipilampah, engke hidep nyaho naon hartina sieun ku Allah, sarta bakal meunang kanyaho tina hal Allah.

⁶Karana kapinteran teh estu kurnia ti Allah. Kanyaho reujeung pangarti, asalna nya ti Mantenna.

⁷Mantenna nyayagikeun pitulung panangtayungan, ka jalma anu bener satemenna,

⁸ngaraksa jalma nu hade ka pada kaula, ngaping jalma anu tumut ka Mantenna.

⁹Lamun papatah Bapa digugu, hidep bakal nyaho naon ari adil, temen jeung jujur, nyaho ka anu kudu dipilampah.

¹⁰Tangtu jadi bijaksana, tur bakal ngarasa bagja dumeh sugih ku kanyaho.

¹¹Pangarti hidep bakal ngajaring, paham bakal ngajaga,

¹²nyegah tina lampah salah, ngajauhkeun ti jelema-jelema nu sasar omonganana,

¹³ti anu naringgalkeun jalan anu lempeng, nyorang jalan nu poek,

¹⁴ti jalma-jalma anu betah dina salah, nu resep milampah jahat,

¹⁵anu hirupna teu make pangered, anu teu beunang diandel.

¹⁶Hidep baris kuat moal kabengbat ku awewe nu barejad ahlak, ahli ngolo-ngolo jeung ngagelo,

¹⁷nu sok serong ti salakina, anu poho kana sumpah suci akad nikah.

¹⁸Sakali hidep nyampeurkeun awewe kitu, sasat nyampeurkeun ajal. Indit ka awewe kitu sarua jeung indit ka enggon nu paeh.

¹⁹Lalaki nu datang nemonan awewe kitu, tara bisa mulang deui, tara nyorang deui jalan anu brasna kana hirup.

²⁰Nu matak hidep kudu niru lakuning jalma satuhu, anu hirupna saestu.

²¹Sakur anu hirupna satemenna, jalma anu taya kuciwana, baris ngancik di dieu, di tanah nagara urang.

²²Demi nu daroraka mah ku Allah baris didudut, nu jarahat baris dicabut ti dinya, lir tangkal anu dirabut jeung akar-akarna.