Read Boros Dusun SILOKA 22 Bible Online

SILOKA 22 - Boros Dusun bible

SILOKA 22

¹Lamun kudu milih, mending milih ngaran seungit ti batan milih kabeungharan.

²Nu beunghar jeung nu miskin aya kasaruanana, nya eta duanana oge PANGERAN anu nyiptakeunana.

³Jalma anu surti mah kana pibahlaeun teh awas, seug disingkahan. Ari nu teu boga pikiran mah noyod bae, temahna kaduhung.

⁴Masing ajrih sarta rendah hate ka PANGERAN, tangtu maneh bisa beunghar, kaajen, jeung umur panjang.

⁵Betah keneh hirup mah ulah nyorang jalan anu aya balahina, anu sok ngajiret jelema jahat.

⁶Budak teh papatahan kumaha kuduna hirup, sangkan ingeteun saumur-umur.

⁷Nu mariskin jaradi badega nu baleunghar, anu nginjeum duit sok jadi budakna anu nginjeumkeun.

⁸Lamun melak kacurangan, bahla pijadieunana, eureun nindes ka batur ge.

⁹Kudu berehan, kudu daek mere dahar ka nu kokoro, tangtu baris meunang berkah.

¹⁰Anu moyok kudu disingkiran, tangtu moal jadi cekcok silih cental atawa silih poyok.

¹¹Lamun mikaresep kana ati suci tur someah hade basa, tinangtu raja ge misobat.

¹²Ku jalan ngabolekerkeun omongan tukang bohong, PANGERAN midamel sangkan hal anu sabenerna kapiara.

¹³Nu kedul mah ngan ulukutek di imah bae, majar teh di luar sieun ditekuk kerud.

¹⁴Awewe bangor ibarat senteg. Jalma anu meunang bebendu ti PANGERAN mah tangtu beunang.

¹⁵Barudak mah biasa sok bolostrong sologoto. Tapi ari dididik hade-hade mah tangtu ngarti.

¹⁶Sering barang kirim ka nu beunghar, atawa ngumpulkeun kabeungharan ku ngagencet nu mariskin, engkena sorangan jadi malarat.

¹⁷Regepkeun, kami rek ngajarkeun pituturna jalma-jalma bijaksana. Pek arulik,

¹⁸tangtu bagja lamun geus bisa kacekel.

¹⁹Ayeuna urang pedar, malak mandar jadi lantaran ngandel ka PANGERAN.

²⁰Eta tilu puluh pitutur ku kami geus dituliskeun jang maraneh, eusina panemu reujeung nasehat anu harade,

²¹nu bakal nuduhkeun naon saenyana nu disebut bener teh. Engke, ari maraneh ditanya sual eta, bisa mere jawaban anu bener.

²²Ulah ngarah untung ti nu mariskin, ulah kena-kena bisa. Ulah meres ka jelema nu taya dayana di pangadilan.

²³Karana PANGERAN baris ngabela perkarana, sarta anu nyilakakeunana baris diarah patina.

²⁴Ulah nyobat jeung jelema nu galede ambek, nu kalasar tabeatna,

²⁵bisi ari katepaan hese miceunna deui.

²⁶Ulah sasanggupanan mangmayarkeun hutang batur.

²⁷Bisi ari teu kabayar, barang-barang maneh tepi ka ranjang-ranjang dirampas.

²⁸Ulah ngarobah-robah wawatesan beunang netepkeun karuhun.

²⁹Kungsi maneh manggih jelema anu hade gawena? Jalma kitu henteu pantes aya dina lingkungan jelema biasa, sabab layak aya dina lingkungan raja-raja.