Read Boros Dusun SILOKA 23 Bible Online

SILOKA 23 - Boros Dusun bible

SILOKA 23

¹Mun urang pareng dahar jeung jelema penting, kudu inget eta teh saha.

²Najan pohara laparna kudu nyengker maneh.

³Ulah mangpang-meungpeung pedah dahareunana ngareunah, boa teuing eta teh rek ngadoja.

⁴Ulah nyusahkeun diri tipoporose hayang beunghar.

⁵Duit mah ku sakilat ge bisa musna, siga nu ngadak-ngadak jangjangan, biur hiber kawas heulang.

⁶Ulah daek dahar di imah jelema kumed, komo nepi ka makmak-mekmek mah pedah ngarareunah.

⁷”Mangga sing kenging,” carekna, padahal ceuk hatena mah lain kitu. Sikepna piseueuleun.

⁸Boa-boa sangu nu geus dihuapkeun ge kautahkeun deui. Cumah urang muji-muji oge.

⁹Ka nu gejul mah ulah pangangguran ngomong nu aya hartina, da moal dihargaan.

¹⁰Ulah mindahkeun wawatesan beunang nangtukeun baheula, ulah ngarampas lahan bogana jalma pahatu,

¹¹sabab nya PANGERAN nu bakal ngabelaan, anu baris ngadu perkara jeung maneh.

¹²Guru teh kudu digugu, regepkeun piwurukna enya-enya.

¹³Tong asa-asa ngawarah budak, diteunggeul saeutik mah budak teh piraku paeh.

¹⁴Neunggeul soteh saenyana mah malah sangkan hirupna karaksa.

¹⁵Anaking, mun hidep bijaksana, Bapa teh bungah.

¹⁶Tada teuing agulna mun ngadenge ucap-ucapan hidep ngareusi.

¹⁷Ulah sirik ku nu marigawe dosa, anggur sing ajrih ka PANGERAN.

¹⁸Lamun kitu, hidep nyanghareupan mangsa anu gumilang.

¹⁹Dengekeun anaking, masing bijaksana, teuleuman jalan hirup teh.

²⁰Poma ulah pipilueun jeung jalma-jalma anu barareuki teuing anggur, atawa tukang ngadedetan bae beuteung.

²¹Sabab pamabokan jeung tukang nyatu mah temahna matak malarat. Hirup ngan nyatu jeung hees bae mah alamat rudin ruwang-rawing.

²²Sing nurut ka bapa, teu ku bapa mah hidep moal aya. Sing ngajenan ka indung di mana indung geus kolot.

²³Bener, hikmah, didikan jeung pangarti, memang mahal pameulina, tapi pohara gede ajenna pikeun hidep upama dijual.

²⁴Jadi bapana jelema bener mah pantes rek ngarasa bagja oge. Anak anu bijaksana, matak agul anu jadi bapa.

²⁵Tarekahan sangkan indung bapa teh agul ku maneh. Senangkeun hate indung teh.

²⁶Lenyepkeun anaking, pek piconto lampah Bapa.

²⁷Awewe palacuran, awewe serong, ibarat senteg nu matak bahla.

²⁸Lampahna kawas garong nu ngadodoho, ngalantarankeun loba lalaki anu henteu saratia.

²⁹Tembongkeun ka Bapa jalma anu loba teuing nginum inuman keras da hayang ngumbar panglamunan. Ku Bapa rek ditembongkeun kaayaanana anu cilaka jeung nyiksa maneh, salilana ngan nyusahkeun bari humandeuar. Matana beureum getih, awakna aleumeur, tur padahal kituna teh bisa disingkiran ku dirina.

³¹Jadi poma hidep ulah kagoda ku anggur inuman, sanajan warnana beureum pikabitaeun, sarta cahayana mani ngenclong, sarta rasana niʼmat ngageleser dina tikoro.

³²Ana isukna geus lilir, awak karasa nyareri asa dipacok ku oray matih,

³³tetenjoan asa lalewang, teu bisa mikir, ngomong ge asa balelol.

³⁴Rarasaan asa keur di tengah lautan, mabok laut, asa kaapungkeun kana congo tihang layar.

³⁵Heug bae ngacaprak, magar teh, ”Aya nu neunggeul ka aing. Aing aya nu neunggeulan, tapi poho deui jelemana. Iraha nya aing rek nyaring teh? Hayang nginum deui.”