Read Boros Dusun SILOKA 24 Bible Online

SILOKA 24 - Boros Dusun bible

SILOKA 24

¹Ulah sirik ka nu jahat, jeung ulah hayang nyobat,

²da itikadna teh ngan arek nyusahkeun bae, saucap-ucapna matak cilaka batur.

³Hikmah jeung pangarti teh dasar ajegna rumah tangga.

⁴Jalma nu boga kanyaho mah kamarna dieusi ku barang-barang anu aralus, marahal.

⁵Bijaksana leuwih utama ti batan gede tanaga. Memang bener kanyaho teh leuwih penting ti batan kabedasan.

⁶Kapan samemeh prung tarung teh kudu ngararancang heula sing taliti, tur beuki loba meunang nasehat, beuki pasti kawasna kana baris unggul.

⁷Nu bodo mah moal ngartieun kana omongan anu jarero eusina. Jadi lamun dibawa badami perkara penting teh ngan ukur bisa ngabetem.

⁸Lamun salawasna boga itikad goreng, maneh bakal kaceluk tukang rusuh.

⁹Pangrarancang jelema gejul mah pidorakaeun wungkul. Ka tukang cacawad mah sarerea ge ngewa.

¹⁰Lamun maneh babari leutik hate ku kasusahan, tetela hengkerna atuh.

¹¹Mun maneh nenjo aya jelema digusur rek dipaehan, geuwat rebut.

¹²Meureun ceuk hate maneh eta lain urusan aing. Tapi eta kereteg kitu teh ku Allah kauninga, tur bakal dibalitungkeun.

¹³Anaking, pek ngadahar madu, alus eta teh. Tah, sakumaha madu tina sayang nyiruan amis karasana ku letah,

¹⁴nya kitu hikmah oge hade pikeun jiwa. Beunangkeun hikmah, tangtu hidep nyanghareupan mangsa anu gumilang.

¹⁵Ulah cara jalma jahat nu ngareka rek ngarampog jalma jujur, atawa ngagusur imahna.

¹⁶Jalma jahat mah tangtu ajur ku balahi. Sabalikna jalma jujur mah sakumaha seringna tibeubeut oge moal weleh menyat deui.

¹⁷Ulah gumbira lamun musuh cilaka, ulah bungah lamun manehna tijungkel.

¹⁸Peta maneh kitu ku PANGERAN kauninga tur teu dirujukan, boa teuing eta musuh teh ku Mantenna moal tulus dihukumna.

¹⁹Ulah jengkel atawa dengki ka jalma nu ngajuligan.

²⁰Nu jahat mah moal jamuga.

²¹Anaking, kudu sieun ku PANGERAN jeung ku raja. Ulah milu ngalawan ka Allah atawa ka raja,

²²da tangtu baris tereh tiwas. Hayang nyaho maneh rasana balahi ti Allah atawa ti raja?

²³Kieu deuih ceuk nu palinter: Salah ari hakim ukur maen sangka bae mah.

²⁴Sabab mun nepi ka jalma salah teu dihukum, hakimna tangtu pada nyapa, ku sasaha ge dipikangewa.

²⁵Hakim nu bener nibankeunana hukuman teh ka nu salah, bakal parek rejekina sarta kawentar ngaranna.

²⁶Jawaban anu sabalakana, tandaning sobat sajati.

²⁷Memeh nyieun imah atawa rek imah-imah, uruskeun heula rajakaya, sangkan reugreug, aya keur tatali hurip.

²⁸Ulah jadi saksi ngalawan tatangga teu karana sabab, atawa ngomong goreng hal dirina.

²⁹Jeung ulah boga rasa, ”Manehna ge kitu ka aing, rek dibales sing satimpal!”

³⁰Pareng kami ngaliwat ka hiji lahan anggur bogana jelema kedul.

³¹Mani pinuh ku ruyuk cucuk jeung daun eurih, pagerna pasolengkrah.

³²Seug ku kami kapikir, nya ieu pituahna. Kieu:

³³Pek kekedengan, pek sare, pek nangkeup tuur ngaso sakeudeung.

³⁴Sabot kitu, gurudag kamalaratan narajang. Lir rampog mawa pakarang.