Read Boros Dusun SILOKA 27 Bible Online

SILOKA 27 - Boros Dusun bible

SILOKA 27

¹Ulah sok agul ku poe isuk, da moal nyaho ka nu baris kajadian isukan teh.

²Utamana dipuji teh ku batur, komo ku nu teu wawuh mah. Ulah muji maneh.

³Kasusah anu dilantarankeun ku kabodoan sorangan, leuwih beurat batan batu, leuwih ampeg batan keusik.

⁴Amarah teh bengis tur ngaruksak. Tapi sirik-pidik mah leuwih-leuwih.

⁵Leuwih hade nyawad terus terang, ti batan disangka embung malire-malire acan.

⁶Najan matak nyeri, ari ti sobat mah hade maksudna. Sabalikna lamun musuh ngarangkul, urang kudu curiga.

⁷Beuteung geus seubeuh mah madu ge embung. Sabalikna lamun eukeur kalaparan, nu pait ge asa amis.

⁸Jalma anu ninggalkeun imah, lir manuk ninggalkeun sayang.

⁹Minyak jeung seuseungitan kaangseuna seger, ari sobat dalit matak teger.

¹⁰Ulah sok poho ka sobat, kitu deui ka sobat bapa. Waktu keur meunang kasusah, teu kudu menta tulung ka dulur. Tatangga deukeut leuwih bisa nulung ti batan dulur nu jauh.

¹¹Sing bijaksana anaking, sangkan Bapa senang, jeung sangkan Bapa bisa ngajawab ka anu nyela ka Bapa.

¹²Jalma anu surti mah kana pibahlaeun teh awas, seug disingkahan. Ari nu teu boga pikiran mah noyod bae, temahna kaduhung.

¹³Pohara kabalingerna sasanggupanan rek mangmayarkeun hutang batur teh, lantaran kudu jeung wani naruhkeun sakabeh kaboga.

¹⁴Ngawilujengkeun oge ari subuh-subuh jeung bari gogorowokan ngahudangkeun mah sarua bae jeung nyarekan.

¹⁵Pamajikan cerewed ibarat cai nyakclakan keur ngecrek hujan.

¹⁶Rek kumaha ngeureunkeunana? Ibarat megatan angin atawa ngeupeul minyak.

¹⁷Budi akal datangna ti pada jalma, cara waja silih asah jeung waja.

¹⁸Lamun tangkal hayang kadahar buahna, kudu diurus hade-hade. Lamun hayang dipikanyaah ku dunungan kudu ngesto.

¹⁹Lir beungeut sorangan kajeueung di jero cai, diri sorangan katempo di jero hate.

²⁰Angen-angen manusa taya beakna, lir alam kubur anu tara pinuh-pinuh.

²¹Emas jeung perak diujina ku seuneu, ari jelema dicobana ku pamuji.

²²Nu gejul mah diteunggeulan satengah paeh ge angger bae gejul.

²³Embe, domba, ingon-ingon, urus raksa sabisa-bisa,

²⁴da kakayaan teh moal saendeng-endeng. Malah bangsa-bangsa oge moal langgeng.

²⁵Ngarit jarami, ngarit jukut di lamping pasir, sabot kitu ge jarami anyar jaradi deui. Ngarit teh kudu pindah ka pasir.

²⁶Hayang boga pakean, nyieun lawonna tina bulu domba. Hayang boga tanah, meuli. Duitna tina ladang ngajual embe.

²⁷Embe anu sawarehna deui peres susuna, keur inumeun maneh sakulawarga, kitu deui keur badega-badega awewe.