Read Boros Dusun SILOKA 29 Bible Online

SILOKA 29 - Boros Dusun bible

SILOKA 29

¹Mun maneh tetep wangkelang saban-saban dielingan, dina hiji mangsa baris sangsara nya diri, moal bisa menyat deui.

²Lamun pamarentah hade, rahayatna sarenang hate. Lamun pamarentah jahat, rahayatna bakal balangsak.

³Anak nu rajin nyiar pangarti, bapa nu senang ati. Make duit geusan lacur, kalakuan anu gejul.

⁴Raja nu nyepeng kaadilan, bangsa nu baris digjaya. Raja anu ngurus bae duit, nagarana baris tumpur.

⁵Anu muji-muji babaturan, tangtu kajiret sorangan.

⁶Jalma jahat bakal kabeulit ku kajahatanana keneh. Ari nu balener mah tangtu bagja sarta laluasa.

⁷Jelema hade mah daek ngahargaan hak-hakna jalma malarat. Jelema jahat mah bororaah kitu.

⁸Jalma gumede bisa matak rusuh sanagara. Mungguh jelema binangkit mah malah nengtremkeun.

⁹Lamun jelema pinter ngadakwa jelema gejul, nu gejulna ukur nyeungseurikeun, tuluy nyarekan laklak dasar.

¹⁰Tukang aus getih mah ka jalma jujur teh ijid. Tapi jalma-jalma anu balener, ka nu jujur teh ngabela.

¹¹Nu gejul mah ambekna sok terus budal. Jalma nu lantip mah sabar, amarahna dikemu.

¹²Lamun pangagung ngagugu kana katerangan-katerangan palsu, pajabat-pajabatna tangtu jaradi tukang bohong.

¹³Boh nu miskin boh nu ngagencetna, duanana sarua dibere panon ku PANGERAN.

¹⁴Raja anu ngaraksa hak-hak rahayatna anu malarat, marentahna bakal awet.

¹⁵Budak mah kudu diatik jeung dipeperih. Mun diantep sakarepna, temahna ngerakeun indung.

¹⁶Lamun anu jarahat jaradi pangagung, kajahatan bakal nyebar. Tapi jalma-jalma nu balener mah baris berekah, sarta baris nyaksian tigulingna pangagung-pangagung anu karitu.

¹⁷Peperih anak teh, sangkan matak agul jeung moal nyieun hal anu matak ngerakeun.

¹⁸Bangsa anu lesot tina pingpinan Allah, tangtu ngaco tanpa aturan. Bagja jalma anu nyekel papagon Allah.

¹⁹Mapatahan bujang mah teu cukup ku omong. Didengena mah didenge, ari dianggap mah moal.

²⁰Loba keneh harepan pikeun jalma bodo, ti batan pikeun jalma anu ngomongna teu jeung pikiran.

²¹Lamun bujang enggeus tuman dicumponan pamentana ti bubudak ahir-ahir sagala harta banda urang diaku anuna.

²²Jalma anu barangasan, sering nimbulkeun pacekcokan jeung kaributan.

²³Angkuh teh ngalantarankeun jelema rubuh. Ari anu rendah hate mah malah pada ngajenan.

²⁴Jalma anu milu ngabangsat, eta teh musuh gedena. Sabab lamun eta di pangadilan ngaku, tangtu dihukum, lamun eta mungkir tangtu disapa ku Allah.

²⁵Rempan ku pakarepan batur teh bahaya. Utamana mah kudu pasrah ka PANGERAN, tangtu salamet.

²⁶Sasaha ge hayang meunang piwelas ti pangagung. Tapi ari nu iasa maparin kaadilan mah ngan PANGERAN.

²⁷Jalma anu bener teu resepeun ka nu jahat. Jalma nu jahat ge teu resepeun ka nu bener.