Read Boros Dusun SILOKA 3 Bible Online

SILOKA 3 - Boros Dusun bible

SILOKA 3

¹Anaking, ulah poho ka papatah Bapa. Nu ku Bapa diucapkeun, omat ku hidep ingetkeun.

²Sabab eta teh matak hade untung sarta panjang umur.

³Ulah tinggal ti satia jeung satuhu, kongkorongkeun eta teh dina beuheung, tulis dina sanubari.

⁴Lamun kitu tangtu ku Allah dimanah, ku jalma dipikaresep.

⁵Kudu temen ngandel ka PANGERAN. Ulah sok ngandelkeun kanyaho sorangan.

⁶Dina sagala laku lampah masing inget ka PANGERAN, tangtu Mantenna nuduhkeun jalan nu lempeng.

⁷Poma ulah boga angkeuh pinter sorangan, anggur masing sieun ku PANGERAN, nyingkah tina lampah salah.

⁸Lamun kitu, eta teh ibarat ubar, kana raheut matak cageur, tur kanyeri oge nyingkir.

⁹Masing hormat ka PANGERAN ku ngabaktikeun sagala rupa hasil bumi lahan hidep anu panghadena.

¹⁰Engke leuit hidep buncir, cianggur ceuyah, ngaleuya mo kawadahan.

¹¹Anaking, ulah nampik lamun ku PANGERAN dipeperih. Tarimakeun ulah sungkan, eta teh pepeling.

¹²Mana dipeperih ge tandaning hidep dipiasih, lir bapa meperih anak anu dipikanyaah.

¹³Bagja jalma anu meunang hikmah, anu meunang pangarti.

¹⁴Sabab eta leuwih untung batan boga perak, pangajina leuwih ti batan emas.

¹⁵Hikmah leuwih hargana ti batan permata, sagala rupa anu dipikahayang ku hidep moal bisa nyaruaan eta.

¹⁶Hikmah nungtun kana panjang umur, parek rejeki tur mulya harkat.

¹⁷Hikmah matak nyenangkeun, hirup ngahenang-ngahening.

¹⁸Nya bagja anu boga hikmah, hirup teh jadi milikna.

¹⁹PANGERAN ngadegkeun bumi ku hikmah-Na. Ngadegkeun langit ku pangartos-Na.

²⁰Ku hikmah Mantenna, cur-cor walungan ngalocor, Mantenna ngayakeun mendung sangkan bumi meunang hujan.

²¹Anaking, cekel sing pageuh hikmah, jeung akal budi, ulah dilesotkeun.

²²Eta nu baris ngalantarankeun hidep bagja jeung jamuga.

²³Bakal tengtrem urang nya leumpang, moal kungsi titajong-tajong acan.

²⁴Sare-sare jongjon da euweuh kakeueung, tibra nepi ka isuk.

²⁵Moal sieun kagerebeg ku bahla nu datangna jeg angin topan, moal cara nu sok kaalaman ku nu jarahat.

²⁶Sabab hidep dijaring ku PANGERAN, diraksa sangkan ulah keuna jiret.

²⁷Iraha bae ge kudu nulung ka nu butuh, sabisa-bisa.

²⁸Lamun tatangga menta tulung ulah ditembalan, ”Isukan bae.” Bisa harita mah harita keneh tulungan.

²⁹Ulah sok ngarancang kajahatan ka sasama, kapan manehna teh hirup bareng-bareng jeung urang sarta percaya ka urang.

³⁰Ulah cekcok taya sabab jeung jelema anu henteu nyieun kua-kieu ka hidep.

³¹Ulah sirik ka nu telenges, jeung ulah hayang nurutan.

³²Sabab nu adatna jahat teh kagiruk PANGERAN. Sabalikna jalma anu satuhu mah jadi kapercayaan Mantenna.

³³Jalma jahat, rumah tanggana ku PANGERAN diterapan panyapa. Rumah tangga jalma satuhu mah diberkahan.

³⁴Mantenna henteu butuh ku nu adigung. Ari nu rendah ati mah ku Mantenna baris dipiasih.

³⁵Jalma bijaksana ngaranna bakal seungit. Jalma bodo bakal tambah-tambah hina.