Read Boros Dusun SILOKA 4 Bible Online

SILOKA 4 - Boros Dusun bible

SILOKA 4

¹Barudak, dengekeun papatah bapa maraneh. Regepkeun supaya boga pangarti.

²Ieu piwuruk hade paedahna, kudu diingetkeun pisan.

³Bapa teh anak tunggal. Bapa keur budak keneh,

⁴ku Ama sok diwurukan. Saurna, ”Ingetkeun papatah Ama, ulah poho. Lampahkeun sangkan jamuga.

⁵Sing meunang hikmah. Sing meunang pangarti. Kade ieu papatah teh ulah dipopohokeun atawa dilalaworakeun.

⁶Ulah ngalalaworakeun hikmah, supaya urang ditangtayungan. Anggur pikadeudeuh, sabab eta teh baris nungtun kana rahayu.

⁷Meunangkeun hikmah teh usaha pangpentingna. Beunangkeun pangarti ku saniskara nu geus kapimilik.

⁸Sing nyaah kana hikmah, engke maraneh dijadikeun jalma mulya. Maraneh bakal jadi jalma nu kaajen, lamun mikadeudeuh hikmah,

⁹nu jadi makuta dina hirup maraneh.”

¹⁰Sing ngagugu ka Bapa, anaking! Papatah Bapa bandungan sing saregep, sangkan panjang-punjung panjang umur.

¹¹Tah, Bapa enggeus ngajarkeun hikmah jeung jalan nu bener geusan hirup.

¹²Lamun hidep ati-ati, iatna nya lampah, berekah moal manggih halangan, mun lumpat hamo titajong.

¹³Ulah poho ka nu ku Bapa geus dipapatahkeun. Sabab atikan teh nya eta sakumna hirup hidep. Jadi kudu dijaga.

¹⁴Ulah saihwan jeung jelema jarahat. Ulah nurutan adat nu daroraka.

¹⁵Ulah! Si Jahat teh jauhan. Hidep mah jongjon-jongjon bae ulah kagoda! Teruskeun enggoning nyorang jalan sorangan.

¹⁶Jalma jahat mah mun teu ngajahat teh sok teu bisaeun hees, gedebag-gedebug panasaran can mergasa batur.

¹⁷Kawantu keur nu jarahat mah ngajalankeun kajahatan jeung katelengesan teh geus cara kana nyatu jeung nginum.

¹⁸Lalampahan jelema anu satuhu, saibarat srangenge medal, beuki beurang beuki caang.

¹⁹Ari nu jahat mah sarua jeung leumpang dina poekna peuting, blug labuh, duka titajong kana naon, da matana teu nenjo.

²⁰Anaking, regepkeun. Dengekeun omongan Bapa.

²¹Kade ulah aya anu lolos. Ingetkeun, cangreud dina ati.

²²Sing saha anu ngarti, bakal diganjar hirup hurip.

²³Masing asak nya mikir, sabab anu nangtukeun watek hirup teh nya pikiran tea.

²⁴Poma ulah ngomong anu lain sabenerna. Kudu pantrang bohong, cadu ngabobodo.

²⁵Sing teteg neuteup ka hareup, hate sing buleud sing yakin, ulah ngeluk semu era.

²⁶Pikir heula sing asak anu arek dipigawe, tangtu sagala anu diusahakeun teh bakal hade jadina.

²⁷Jauhan anu jahat, lampah sing lempeng. Poma ulah nyimpang ti jalan anu bener.