Read Boros Dusun PANDITA 1 Bible Online

PANDITA 1 - Boros Dusun bible

PANDITA 1

¹Ieu teh sabda Ki Pandita, putra Daud, raja di Yerusalem.

²Mubadir, mubadir, saur Ki Pandita. Hirup teh sihoreng mubadir, saniskarana mubadir.

³Da naon atuh paedahna digawe tisusut tidungdung saumur hirup teh?

⁴Turunan nu ieu datang, turunan nu itu undur, sabalikna jagat mah tetep-tumetep.

⁵Bray panonpoe medal, reup panonpoe surup, keureuyeuh malik ka urutna bijil, karayap maju deui.

⁶Angin nyewuk ka kidul, nyewuk ka kaler, putar-puter bulak-balik.

⁷Walungan kabeh bahena ka laut, bet laut teu pinuh-pinuh. Caina malik mulang ka sirah walungan, geus kitu ka hilir deui.

⁸Saniskara hal ngan matak ka cape-cape, nyaritakeunana oge cape. Panon teu seubeuh-seubeuh mireungeuh, ceuli teu weleh-weleh ngadenge.

⁹Nu bareto enggeus aya engkena teh aya deui. Nu bareto geus kasorang engkena kasorang deui. Ana kitu di kolong langit mah taya perkara nu anyar.

¹⁰Jadi lamun aya anu nyebutkeun, ”Tah ieu mah anyar,” na enya eta teh? Da geuning anu majar anyar teh ti baheula keneh ge, ti memeh urang gumelar geus aya.

¹¹Kana kajadian baheula-baheula hamo aya anu inget, pon kitu jaman anu masih bakal datang moal kaingetkeun ku anu harirupna sabada jaman eta.

¹²Kami, Ahli Pikir, raja nu nyangking Israil di Yerusalem.

¹³Kami geus gilig seja nguji jeung nalungtik sagala anu enggeus kajadian di kolong langit. Manusa mah ku Allah geus dikersakeun kudu nyorang hese cape.

¹⁴Kami geus nyukcruk saniskara anu geus dipigawe di alam dunya. Bet geuning kabeh ge mubadir, kawas ngajaring angin.

¹⁵Anu bingkeng taya anu bisa ngalelempeng, anu teu aya euweuh anu bisa milang.

¹⁶Ceuk hate, ”Aing teh nya agung nya pinter, leuwih ti nu sejen-sejen anu geus ti hareula jenengna raja di Israil, beunghar ku hikmah pinuh ku pangaweruh.”

¹⁷Tuluy gilig seja nalungtik naon bedana kapinteran jeung kabodoan, bedana hikmah jeung kagejulan. Anu kapanggih ku kami: Ieu oge taya bedana ti ngajaring angin.

¹⁸Horeng jelema mah beuki pinter teh beuki loba kasalempang, beuki loba kanyaho beuki loba kahariwang.