Read Boros Dusun KIDUNG AGUNG 1 Bible Online

KIDUNG AGUNG 1 - Boros Dusun bible

KIDUNG AGUNG 1

¹Kidung anggitan Suleman. Endah taya papadana.

²Hayang teuing abdi ku engkang diambung, kadeudeuh engkang langkung ni’mat ti batan anggur.

³Wawangen engkang raraos seungitna, jenengan engkang lir lisah seungit nyambuang. Wanoja mana nu ku engkang teu kagembang.

⁴Cik atuh abdi teh iwat, duh sembahan abdi, candak lebet ka kamar, bari dipapag ku bagja, bakal jojoh nyacapkeun kasono. Wanoja mana nu ku engkang teu kagembang.

⁵Leuh wanoja-wanoja Yerusalem, hideung oge kuring teh geulis, hideung siga kemah urang Kedar, endah siga lalangse-lalangse karaton Suleman.

⁶Tong ditelek-telek hideungna, kawantu kuring mah tuman kapoe, tur jadi purah tadah carek dulur-dulur, purah tunggu kebon anggur, awak teh geus teu kaurus.

⁷Duh panutan cik wartosan, di mana engkang nya ngangon, di mana ngaubkeun domba-domba ari sonten? Na abdi milarian engkang teh kedah ngaprak ka tengah kumpulan domba anu lian?

⁸Leuh bentangna wanoja, karah teu uninga tempatna? Sae tuturkeun bae tapak domba-domba, pilari sampalan keur embe-embe enung caket kemah-kemah tarukang ngangon.

⁹Jungjunan, enung lir ibarat kuda bikang anu narik kareta raja Mesir.

¹⁰Rambut enung aya ku endah, tinggilisir kana damis, ngarumbay kana tenggek lir ranggeuyan mutiara.

¹¹Engke enung dipangnyieunkeun kangkalung emas, ditarapang ku perak.

¹²Sang raja ebog dina bale-bale, seuseungitan pake abdi kaangseu angin-anginan.

¹³Barang gabrug anjeunna kana harigu, kaangseu salirana seungit emur.

¹⁴Anjeunna lir ranggeuyan kembang pacar, anu beukah di kebon anggur di Engedi.

¹⁵Ku geulis enung, jungjunan, soca enung ngenclong ku cahaya cinta!

¹⁶Ku kasep engkang teh, panutan, engkang teh estu pikaresepeun abdi! Kangge ebog, tuh katilna jukut hejo anu ngampar.

¹⁷Keur minangka tihang bumina kai kiputri. Keur minangka lalangitna tangkal camara.