Read Boros Dusun KIDUNG AGUNG 2 Bible Online

KIDUNG AGUNG 2 - Boros Dusun bible

KIDUNG AGUNG 2

¹Abdi mah mung ukur kembang alas ti Saron, kembang bakung ti lengkob gunung.

²Enung ibarat bakung di rungkun cucuk, pangmencrangna ti para wanoja.

³Dibanding sareng nonoman lian, panutan abdi lir tangkal jeruk di leuweung kakayon. Abdi betah ngiuhan handapeunana, buahna kalintang amisna.

⁴Ku anjeunna kuring dicandak kana pestana, diumbul-umbulan ku kageugeutna.

⁵Cik pulihkeun bayu kuring ku kismis, segeran ku jeruk, kawantu kuring keur lanjung nandangan wuyung.

⁶Sirah kuring disangkeh ku panangan kiwana, panangan tengenna pageuh ngarangkul.

⁷Wanoja-wanoja Yerusalem, aranjeun kudu jarangji, sumpah demi uncal anu rikat jeung demi uncal bikang ulah rek ganggu kana kacinta kuring jeung anjeunna.

⁸Ngeng kadenge gentra panutan, anjeunna eukeur ka dieu, lumpat ngambah pagunungan, ngaluncatan pasir-pasir rek neang kuring.

⁹Lumpatna tinanding uncal bikang, rikat lepas kawas uncal jalu. Tuh geus aya luareun kuta, nempo tina kisi-kisi, tembong gurilap socana luareun jandela.

¹⁰Anjeunna ngagentraan ka kuring. Ka dieu atuh, enung! Sumping atuh ka engkang, jungjunan!

¹¹Musim ngijih geus kasilih, musim hujan geus kaliwat.

¹²Di tepis wiring kekembangan barareukah, jalma-jalma tinghaleuang; di tegalan tikukur patingarengguk.

¹³Buah kondang geus arek arasak, hawa meleber ku seungitna kembang anggur. Ka dieu atuh, enung! Sumping atuh ka engkang, jungjunan!

¹⁴Enung ibarat japati, nu keur nyumput dina gowok batu karang. Engkang hayang neuteup endahna raray enung, hayang nguping sora enung nu halimpu.

¹⁵Urang ngepung ajag, ajag-ajag leutik, bisi ngaruksak pelak anggur urang anu eukeur karembangan.

¹⁶Jungjunan kuring teh anu kuring, diri kuring anu anjeunna. Anjeunna ngangon dombana di antara kembang bakung,

¹⁷tugur nepi ka bray beurang, nepi ka poek kasilih ku caang. Geura mulih, panutan, masing rikat kawas uncal bikang, masing gancang lir uncal jalu di pagunungan Beter.