Read Boros Dusun YESAYA 2 Bible Online

YESAYA 2 - Boros Dusun bible

YESAYA 2

¹Ieu timbalan Allah, anu didawuhkeun ka Yesaya putra Amos, perkara Yuda jeung Yerusalem:

²Engke ka hareup, gunung tempat Bait Allah ngadeg bakal muncul pangluhurna, mucunghul ngaluhuran pasir-pasir, bakal kasaba ku loba bangsa.

³Rahayat eta bangsa-bangsa bakal silih ajak: ”Hayu urang naranjak ka pasir, pangcalikan PANGERAN, urang ka Baitna Allah Israil. Engke urang ku Mantenna diwulang pilampaheun, sangkan napak kana jalan pituduh-Na. Sabab piwulang PANGERAN teh datangna ti Yerusalem, ngandika-Na ka umat-Na teh ti Sion.”

⁴Mantenna bakal memeres perkara bangsa-bangsa galede. Maranehna bakal ngarobah pedangna jadi wuluku, tumbakna dijieun arit. Bangsa-bangsa moal perang deui, moal tatahar perang deui.

⁵Eh turunan Yakub, hayu urang nyorang jalan anu caang panuduhan PANGERAN!

⁶Nun Allah, Gusti parantos miceun umat ku anjeun, turunan Yakub. Tanahna pinuh ku tukang sihir ti wetan sareng ti tanah Pelisti. Rahayatna biluk kana adat bangsa batur.

⁷Tanahna pinuh ku emas perak, harta sisimpenanana teu aya watesna. Kudana kacida seueurna, kareta perangna parantos henteu kaetang.

⁸Tanahna pinuh ku brahala, maranehna nyarembah kana barang buatanana sorangan.

⁹Kabehanana bakal direndahkeun jeung dihinakeun. Nun PANGERAN, mugi ulah dihampura maranehna teh!

¹⁰Maranehna bakal marubus ka guha-guha di gunung-gunung cadas, atawa ngarali liang nyingkiran PANGERAN anu keur bendu, nyingkahan pangawasa jeung kamulyaana-Na.

¹¹Hiji waktu katakaburan jeung kaangkuhan manusa bakal eureun, dibasmi. Ngan PANGERAN anu bakal diagungkeun.

¹²Dina waktu eta PANGERAN Nu Maha Kawasa bakal ngarendahkeun sakur anu aragung, anu aradigung.

¹³Tangkal-tangkal kiputri di Libanon anu laluhur, kitu deui tangkal-tangkal kiara di tanah Basan ku PANGERAN bakal dibasmi.

¹⁴Gunung-gunung nu laluhur kitu deui pasir-pasir bakal diratakeun jeung taneuh.

¹⁵Kitu deui munara-munara anu laluhur jeung sakabeh kuta puri benteng.

¹⁶Malah kapal-kapal anu panggaledena jeung pangalusna ge bakal dikarem-karemkeun.

¹⁷Katakaburan manusa bakal eureun, kaadigungan bakal dibasmi. Brahala-brahala bakal beak. Dina waktu eta ngan PANGERAN anu bakal diagungkeun.

¹⁹Jalma-jalma bakal nyarumput di guha-guha di gunung-gunung cadas, atawa ngarali liang nyingkiran PANGERAN anu keur bendu, nyingkahan pangawasa jeung kamulyaana-Na, mangsa Mantenna rawuh seja ngoyagkeun jagat.

²⁰Dina waktu eta jalma-jalma bakal ngalung-ngalungkeun brahala-brahala tina perak jeung emas bubuatanana sorangan, sina diruksak ku beurit cantung jeung lalay.

²¹Lamun PANGERAN geus sumping rek ngoyagkeun jagat, jalma-jalma bakal nyarumput kana guha-guha di gunung-gunung cadas nyingkiran PANGERAN anu keur bendu, nyingkahan pangawasa jeung kamulyaana-Na.

²²Nu matak ge ulah sok sumender ka manusa. Bisa naon manusa mah!