Read Boros Dusun YESAYA 21 Bible Online

YESAYA 21 - Boros Dusun bible

YESAYA 21

¹Ieu pangandika perkara Babul.Aya bahla keur ngancam, datangna ti hiji nagri anu pikagimireun, ngahiuk ngaliwatan gurun keusik, nyapu lir angin puyuh.

²Kaula boga tetenjoan ngeunaan kajadian-kajadian anu kacida telengesna, hal nu hianat jeung ngaruksak. Eh balad Edom, geura narajang! Eh balad Media, geura kepung kota-kota! Allah bakal namatkeun kasangsaraan anu dilantarankeun ku Babul.

³Eta tetenjoan katingalna jeung kadengena matak gimir, kaula kacida sieunna. Jeung awak asa rocop kawas awewe rek ngajuru.

⁴Sirah asa muter, awak ngadaregdeg bawaning ku sieun. Ngarep-ngarep geura peuting, geus peuting malah jadi lelenyapan.

⁵Nu katenjo teh dahareun beunang ngatur, tamu-tamu dariuk dina pramedani dalahar nginum. Sabot kitu ngadak-ngadak aya sora anu marentah kieu, ”Para perwira, siap tameng!”

⁶Ti dinya PANGERAN nimbalan ka kaula, ”Maneh kudu nempatkeun prajurit jaga, sina ngalaporkeun tetenjoanana.

⁷Lamun geus nenjo anu tarumpak kuda ngarendeng dua-dua, jeung anu tarumpak kalde jeung onta, awaskeun terus.”

⁸Prajurit jaga ngagero, ”Kuring geus aya di pos jaga, taki-taki beurang peuting!”

⁹Ujug-ujug, tuh geus daratang! Tarumpak kuda ngarendeng dua-dua. Prajurit jaga ngagero, ”Babul geus rubuh! Brahala-brahala sesembahanana balencar mayak dina taneuh!”

¹⁰Leuh Israil bangsa kaula, aranjeun geus diluluh, kawas gandum diirik. Ieu kaula mere warta pikabungaheun, asalna ti PANGERAN Nu Maha Kawasa, Allah panutan Israil.

¹¹Ieu pangandika perkara nagri Edom. Aya anu ngagero ka kaula ti Edom, pokna, ”Prajurit jaga! Lila keneh ieu peuting teh? Iraha rek enggeusna?”

¹²Tembal kaula, ”Sakeudeung deui ge isuk. Tapi engke oge peuting deui. Bisi rek nanyakeun deui heug bae, engke ka dieu deui!”

¹³Ieu pangandika perkara Arab. Eh kapilah urang Dedan nu mareuting di tegal tanah Arab!

¹⁴Bere cai sakur nu datang kahalabhaban. Eh urang Tema, bere dahareun sakur anu keur ngungsi.

¹⁵Maranehna keur kalabur nyingkahan pedang anu geus rek nyabet, nyingkiran jamparing nu geus dipentang, nyingkahan sagala bahya perang.

¹⁶Geus kitu PANGERAN nimbalan ka kaula, ”Moal kungsi sataun deui ge kaagungan kaom-kaom Kedar teh musna.

¹⁷Jalma-jalma pasukan panahna panggaragahna, tapi engke mah ngan tinggal saeutik. Kitu timbalan Kami, PANGERAN Nu Maha Kawasa.”