Read Boros Dusun YESAYA 33 Bible Online

YESAYA 33 - Boros Dusun bible

YESAYA 33

¹Picilakaeun musuh urang! Ayeuna ngan rarampog jeung nipu, ari maranehna mah tara dirampog tara ditipu. Tapi rarampogna bakal eureun, nipuna bakal enggeusan, sabalikna maranehna anu bakal dirampogan jeung ditipu.

²Nun PANGERAN, abdi-abdi nyuhunkeun piwelas, sumeja muntang. Siang-wengi nyuhunkeun diraksa, hoyong kaluar tina kasukeran.

³Waktos Gusti mangmerangankeun abdi-abdi, bangsa-bangsa kalabur ti pangperangan anu gumuruh,

⁴harta bandana diranjah jadi jarahan.

⁵Maha Agung PANGERAN! Mantenna ngasta saniskara. Yerusalem ku Mantenna dieusi ku kaadilan jeung kasatuhuan.

⁶Bangsa teh ku Mantenna disina reugreug. Umat-Na salawasna diraksa, dipaparin hikmah jeung pangarti. Harta maranehna anu pangmulyana nya eta rasa hormat ka PANGERAN.

⁷Tuh jalma-jalma prawira tingjarerit tulung-tulungan. Para utusan anu rek marenta rapih kabeh careurik.

⁸Jalan-jalan gede sepi taya jalma anu ngulampreng, sabab kacida bahyana. Perjangjian-perjangjian karapihan aludar, hasil-hasil mupakat garagal. Jalma-jalma geus henteu silih hargaan.

⁹Tanahna jadi mubadir, suwung. Leuweung-leuweung di Libanon ngalakay. Lebak Saron anu subur jadi gundul. Dangdaunan di tanah Basan jeung Gunung Karmel murudul.

¹⁰Dawuhan PANGERAN ka bangsa-bangsa, ”Ayeuna Kami rek meta, rek nembongkeun kumaha kawasana Kami.

¹¹Rarancang maraneh kabeh bakal mubadir, gaplah sagala tarekah. Roh Kami lir seuneu, maraneh bakal diduruk.

¹²Maraneh bakal ngaley kawas batu kapur dibeuleum jadi apu, kawas cucuk diduruk jadi lebu.

¹³Jalma-jalma jauh deukeut bakal nyaraho kana damel jeung pangawasa Kami.”

¹⁴Urang Sion anu daroraka bakal ngarompod kasieunan. Jeung carekna, ”Hukuman ti Allah teu beda ti seuneu anu salawasna ngagegedur. Bisa urang luput tina seuneu sakitu gedena?”

¹⁵Bisa, asal bener ucap jeung lampah. Ulah jahat ka nu malarat kena-kena kuat, ulah beunang kasogok ku pangruruba. Ulah sapongkol jeung nu boga niat maehan atawa jeung nu boga kalakuan jahat lianna.

¹⁶Lamun kitu geus tangtu maraneh salamet, bakal aman kabina-bina lir aya di jero benteng anu tohaga tur cukup dahareun jeung inumeun.

¹⁷Maraneh bakal ngalaman deui boga raja anu mulya di tanah anu pohara legana.

¹⁸Kasieun maraneh bareto ku mata-mata jeung ku urang asing purah narik pajeg moal kaalaman deui, kari dina ingetan.

¹⁹Urang asing anu garumede, anu basana ku maraneh teu kaharti, moal katenjo-tenjo deui.

²⁰Tenjo Sion, kota tempat urang riungan jeung ngayakeun pesta-pesta kaagamaan! Tenjo Yerusalem! Bakal pohara reugreugna eta pamatuhan teh! Ibarat kemah anu moal pindah-pindah, patok-patokna parageuh nancebna, tali-talina moal pegat.

²¹Urang bakal maratuh di sisi walungan-walungan anu galede, lalega, tapi kapal-kapal musuh moal bisa layar di dinya.

²²Tali layar kapal-kapal musuh tanpa guna, lantaran layarna tingkulapes! Barang-barang musuh bakal dirampasan ku urang. Barang-barangna kacida lobana, nepi ka jelema lumpuh ge kabagian. PANGERAN ku manten anu bakal jadi raja urang, anu marentah jeung ngaraksa urang.

²⁴Anu maratuh di tanah urang moal aya anu udah-aduh ku panyakit, sarta dosa-dosa kabeh bakal dihampura.