Read Boros Dusun YESAYA 35 Bible Online

YESAYA 35 - Boros Dusun bible

YESAYA 35

¹Tanah keri bakal suka seuri. Tegal garing bakal pinuh ku kekembangan.

²Gurun keusik bakal ngawih jeung surak, jadi endah lir gunung-gunung di Libanon, lendo lir kebon-kebon di Karmel jeung Saron. Kamulyaan Allah, agung-Na, kawasa-Na, bakal tembong ka unggal jalma.

³Tegerkeun leungeun nu ngaplek, jagjagkeun tuur anu nyorocod.

⁴Bejakeun ka anu keur laleutik hate: ”Sing teger, tong sieun! Allah sumping baris ngajait, jeung ngahukum musuh maraneh.”

⁵Nu lolong bakal bisa nenjo, nu torek bakal bisa ngadenge.

⁶Nu lumpuh bakal bisa luncat jeung ngigel, nu pireu bakal bisa susurakan. Kocoran-kocoran cai bakal ngalocor di gurun keusik.

⁷Keusik anu semu hurung bakal jadi talaga, tanah kelang bakal pinuh ku cinyusu, jadi pangabetah ajag, manjah jeung kaso jaradi.

⁸Bakal aya jalan ngabulungbung, ngaranna ”Jalan Kasalametan”. moal katincak ku jalma jahat. Anu nyorang eta jalan, moal kasasabkeun ku anu gejul.

⁹Singa jeung sato galak lianna, moal aya nu liwat ka dinya. Sakur anu geus dijait ku PANGERAN, marulangna make eta jalan.

¹⁰Bakal narepi ka Yerusalem bari barungah, ngarawih, garerah. Maranehna bakal bagja salalawasna, moal nandangan deui kasusah jeung kanalangsaan.