Read Boros Dusun YESAYA 57 Bible Online

YESAYA 57 - Boros Dusun bible

YESAYA 57

¹Jelema-jelema nu balageur geus maraot, tur taya nu ngarti, taya nu mirosea. Tapi maraotna teh luput tina kacilakaan.

²Nu balageur mah maraotna bakal reureuh dina katengtreman.

³Ari maraneh, tukang migawe dosa, ka darieu, ieu hukuman tarima! Maraneh teu leuwih hade ti tukang sihir, tukang ngaranyed, jeung tukang lacur.

⁴Saha karah anu ku maraneh dijieun lulucon jeung dilelewe teh, eh jelema-jelema palsu?

⁵Maraneh nyarembah ka dewa-dewa kasuburan, ngaranyed di handapeun tangkal-tangkal karamat maraneh. Anak sorangan dikurbankeun, dipeuncit dina beulah-beulah cadas deukeut sirah walungan.

⁶Maraneh ti dinya mulung batu reok anu lesang, disembah jeung dipiallah, dipangnyiciankeun anggur, dikurbanan gandum. Dikira Kami panuju?

⁷Di gunung-gunung anu laluhur maraneh ngurban jeung nyacapkeun birahi.

⁸Brahala-brahala lambang lampah cabul ku maraneh mani diteundeun dina bangbarung panto, Kami mah geus diculkeun. Seug maraneh teh bubuka pakean, naek kana ranjang gede, otel nepi ka seubeuh jeung awewe anu dihaja dibayar keur kitu.

⁹Maraneh nyarembah ka si Molek, mere seuseungitan jeung paparem. Maraneh sok ngahaja nitahan jelema sina neangan brahala- brahala ka mana-mana keur sembaheun, malah nepi ka enggon nu paeh neangan teh.

¹⁰Maraneh nareangan brahala-brahala lianna deui teh datang ka carape, tapi teu teter-teter. Pangira maraneh mah eta sumanget kitu teh ti brahala-brahala lambang cabul maraneh.

¹¹PANGERAN ngadawuh, ”Na saha eta brahala-brahala anu ku maraneh disembah teh, nepi ka maraneh wani ngabohong jeung poho ka Kami? Naha pedah Kami ngantep sakitu lilana, pang maraneh teu hormat deui ka Kami teh?

¹²Pamikir maraneh mah eta kalakuan kitu teh bener. Kalakuan maraneh kitu ku Kami rek dibolekerkeun, brahala-brahala maraneh pamohalan bisa ngabelaan.

¹³Mun engke maraneh jejeritan menta tulung, keun eta arca-arca teh sina nyalametkeun maraneh. Sakali ge dikebut ku angin, ngarapung eta arca-arca teh! Sabalikna anu muntang ka Kami mah bakal tetep matuh di ieu tanah, bisa ngabakti ka Kami di Bait Kami.”

¹⁴PANGERAN ngadawuh, ”Umat Kami sina baralik ka Kami deui. Jieun jalanna, singkirkeun hahalangna!

¹⁵Kami teh Allah anu maha luhur jeung suci, anu jumeneng salalanggengna. Panglinggihan Kami luhur jeung suci, tapi Kami oge ngareujeungan ka anu rarendah hate jeung tarobat, geusan mulihkeun kayakinan jeung pangharepanana.

¹⁶Kami rek ngahirupan maranehna, moal diseukseukan atawa dibenduan deui sapapanjangna.

¹⁷Kami mah bendu soteh ku tina dosa jeung kasarakahan maranehna, nu matak ku Kami dihukum, ditinggalkeun. Tapi maranehna ngan ngalawan bae, hirupna sakarep-karep.

¹⁸Kami geus nenjo kalakuanana kumaha. Tapi ku Kami rek dicageurkeun, rek ditungtun ditulungan, anu prihatin rek dililipur.

¹⁹Rahmat Kami teh pikeun kabeh, nu dareukeut nu jarauh. Maranehna ku Kami rek dicageurkeun.

²⁰Tapi jelema jahat mah saibarat laut motah, salawasna ombak-ombakan bae nyered runtah jeung rupa-rupa kokotor.

²¹Nu marigawe dosa mah moal manggih katengtreman,” timbalan PANGERAN.