Read Boros Dusun IMAMAT 11 Bible Online

IMAMAT 11 - Boros Dusun bible

IMAMAT 11

¹PANGERAN ngandika ka Musa jeung Harun, ngandikakeun aturan-aturan

²pikeun urang Israil. Sasatoan anu aya di darat anu meunang ku maraneh didahar,

³nya eta anu kukuna beulah jeung ngagayem.

⁴Tapi onta, marmot jeung kelenci mah najis teu meunang didahar, sabab enya ge ngagayem tapi kukuna henteu beulah.

⁷Babi oge haram, teu meunang didahar, sabab enya ge kukuna beulah tapi henteu ngagayem.

⁸Pacuan ngadahar sato anu najis, antel kana bangkena ge ulah.

⁹Lauk anu sisitan jeung cecepetan meunang didahar.

¹⁰Anu teu meunang didahar nya eta sarupaning sato cai anu henteu sisitan jeung teu cecepetan;

¹¹nu kitu kudu dinajiskeun, ulah bon didahar, dicabak bangkena ge teu meunang.

¹²Jadi naon bae sarupaning sato cai anu henteu sisitan henteu cecepetan teu meunang didahar.

¹³Manuk anu henteu meunang didahar nya eta rajawali, bueuk, heulang, dadali, alap-alap, kaak, gagak, manuk onta, camar, bango, belokok, julang, kapimis, koreak, atawa kalong.

²⁰Sato hama anu jarangjangan eta najis,

²¹kajaba anu sok ngarajlok.

²²Maraneh meunang ngadahar simeut, jangkrik, jonggrang.

²³Sato lalembut sejenna anu jarangjangan kitu deui anu ngarayap kudu dinajiskeun.

²⁴Sing saha anu nyabak bangke sato anu kukuan, awakna jadi najis nepi ka surup panonpoe, kajaba lamun kukuna beulah sarta ngagayem, kitu deui sasatoan suku opat anu cekeran. Anu mawa bangke sato najis kudu nyeuseuh pakeanana, tapi awakna tetep najis nepi ka burit.

²⁹Ganggarangan, beurit cantung, beurit leutik jeung cakcak, kudu dinajiskeun.

³¹Anu nyabak nu kitu atawa kana bangkena, bakal kanajisan nepi ka burit,

³²naon bae anu karagragan ku bangkena jadi najis. Paparabotan paranti naon bae, tina kai, tina lawon, tina kulit atawa tina goni, lamun karagragan ku bangke sato najis jadi najis. Kudu buru-buru dikelabkeun kana cai, tapi kaayaanana mah tetep najis nepi ka burit.

³³Lamun bangkena ragrag kana wawadahan tina taneuh, saeusi eta wadah jadi najis, wadahna kudu terus dipeupeuskeun.

³⁴Sabab sanajan dahareun anu halal ge ari caina tina eta pariuk mah jadi najis, kitu deui cai inum tina eta wadah anu najis.

³⁵Naon bae anu karagragan ku nu kitu kudu dipeupeuskeun; anglo atawa hawu oge kudu dipeupeuskeun.

³⁶Tapi cinyusu atawa sumur mah caina tetep beresih, sanajan anu sejenna mah mun kakeunaan ku bangke nu kitu teh jadi najis.

³⁷Sisikian anu geus rek dipelakkeun karagragan ku bangke nu kitu, kaayaanana tetep beresih.

³⁸Tapi lamun karagraganana keur waktu eta siki bibit dikeueum, jadi najis.

³⁹Anu nyabak bangke sato sanajan sato halal, jadi najis nepi ka burit.

⁴⁰Saha-saha anu ngahakan bangkena kudu nyeuseuh pakeanana, tapi awakna mah tetep najis nepi ka burit. Anu mawa bangkena, eta oge kudu nyeuseuh pakeanana, tapi awakna mah tetep najis nepi ka burit.

⁴¹Sato-sato taneuh anu lalembut teu meunang didahar,

⁴²boh anu leumpangna ngagulusur ku beuteung, boh anu leumpangna ku suku opat atawa sukuna loba.

⁴³Pacuan ulah nganajiskeun maneh ngadahar anu karitu.

⁴⁴Karana Kami PANGERAN Allah maraneh teh suci. Jadi maraneh oge kudu nyucikeun diri.

⁴⁵Kami teh PANGERAN anu ngaluarkeun maraneh ti Mesir, nepi ka jadi Allah maraneh. Kami teh suci, jadi maraneh oge kudu suci.

⁴⁶Ieu kabeh jadi aturan anu ngeunaan sasatoan, manuk, sato cai, jeung sato taneuh.

⁴⁷Maraneh kudu taliti ngabedakeun mana anu najis mana anu henteu najis, mana anu meunang didahar mana anu henteu.