Read Boros Dusun IMAMAT 13 Bible Online

IMAMAT 13 - Boros Dusun bible

IMAMAT 13

¹PANGERAN ngandikakeun ieu papakon ka Musa jeung Harun.

²Upama aya jelema nu kulitna carenang atawa radang atawa baruntus siga kasakit lepra kudu sina ngadeuheus ka imam kaom Harun,

³menta dipariksa. Lamun bulu dina lebah eta jadi bodas jeung korengna legok, enya lepra. Ku imam kudu dinyatakeun najis.

⁴Upama ukur semu bodas jeung henteu legok jeung buluna henteu jadi bodas, jelemana kerem tujuh poe.

⁵Dina katujuh poena pariksa deui. Mun radangna henteu ngalegaan, kerem deui tujuh poe.

⁶Dina katujuh poena pariksa deui. Upama radangna henteu ngalegaan malah ngipisan, eta radang biasa bae. Ku imam kudu dinyatakeun beresih. Pakeanana sina diseuseuh, jelemana geus beresih.

⁷Upama ti saentas dipariksa jeung dinyatakeun beresih tea radangna ngalegaan, kudu ngadeuheus deui ka imam,

⁸menta dipariksa deui. Upama tetela radangna ngalegaan, ku imam kudu dinyatakeun najis, sabab eta teh lepra.

⁹Anu katerap ku kasakit anu disangka lepra, kudu ngadeuheus ka imam,

¹⁰menta dipariksa. Upama radangna semu bodas jeung nanahan, sarta bulu lebah radangna jadi bodas,

¹¹eta tanda kasakit leprana geus lila. Ku imam kudu dinyatakeun najis. Teu kudu dikerem heula da geus sidik najisna.

¹²Upama kasakitna geus nyaliara kana sirah jeung suku,

¹³ku imam kudu dipariksa deui. Upama tetela geus nyaliara ka sakujur awakna, ku imam kudu dinyatakeun beresih. Upama saluluar kulitna jadi bodas, eta beresih.

¹⁴Tapi upama radangna teh melekah, eta najis.

¹⁵Ku imam kudu dipariksa deui. Upama bener radangna melekah, kudu dinyatakeun najis. Eta kasakit lepra. Jelemana jadi najis.

¹⁶Upama jadi cageur sarta rupana jadi bodas, kudu ngadeuheus deui ka imam,

¹⁷menta dipariksa. Upama urutna jadi bodas, ku imam kudu dinyatakeun beresih, sabab beresih.

¹⁸Upama aya nu bisul cageur,

¹⁹seug dina urutna jadi koreng semu bodas, atawa coklat bodas semu beureum, kudu ngadeuheus ka imam.

²⁰Ku imam kudu dipariksa. Upama korengna ngalegokan jeung buluna jadi bodas, eta teh lepra anu ngamimitianana dina urut bisul.

²¹Tapi upama keur waktu dipariksa ku imam buluna henteu bodas jeung korengna henteu legok sarta warnana ipis, jelemana kudu dikerem tujuh poe heula.

²²Upama korengna ngalegaan, ku imam kudu dinyatakeun najis, eta lepra.

²³Upama angger sakitu henteu ngalegaan, eta mah urut bisul bae, ku imam kudu dinyatakeun beresih.

²⁴Anu kulitna tutung ku seuneu seug jadi boleksek jeung semu bodas atawa bodas semu beureum,

²⁵kudu dipariksakeun ka imam. Upama bulu lebah dinya jadi bodas sarta borokna legok, eta lepra, anu ngamimitianana dina bagian anu tutung. Ku imam kudu dinyatakeun najis.

²⁶Tapi lamun buluna henteu jadi bodas, korengna henteu legok sarta warnana ipis, ku imam kudu dikerem tujuh poe.

²⁷Dina katujuh poena ku imam kudu dipariksa deui. Upama ngalegaan, eta lepra, ku imam kudu dinyatakeun najis.

²⁸Tapi upama angger teu kitu kieu sarta warnana ipis, eta lain lepra, ukur koreng tapak kabeuleum bae, ku imam kudu dinyatakeun beresih.

²⁹Boh lalaki boh awewe anu koreng dina sirah atawa gado,

³⁰kudu dipariksakeun ka imam. Upama korengna legok sarta buukna jadi semu koneng jeung curiwing, eta teh lepra. Jelemana kudu dinyatakeun najis.

³¹Upama waktu keur dipariksa ku imam korengna henteu legok, tapi buuk lebah dinya goreng jadina, jelemana kudu dikerem tujuh poe.

³²Dina katujuh poena ku imam kudu dipariksa deui. Lamun korengna henteu ngalegaan henteu ngalegokan sarta buukna geus henteu koneng,

³³buuk sabudeureun korengna sina dikurud. Terus kerem tujuh poe deui.

³⁴Dina katujuh poena ku imam kudu dipariksa deui. Lamun korengna angger henteu ngalegaan henteu ngalegokan, ku imam kudu dinyatakeun beresih, sarta jelemana kudu nyeuseuhan papakeanana.

³⁵Tapi upama ti saentas ku imam dinyatakeun beresih teh korengna ngalegaan,

³⁶ku imam kudu dipariksa deui. Lamun bener panyakitna ngalegaan, buuk atawa janggotna teu kudu dipariksa deui semu koneng henteuna, sabab geus tetela eta jelema teh jadi najis.

³⁷Tapi upama ceuk timbangan imam korengna henteu ngalegaan jeung buukna geus mimiti jaradi deui, ku imam kudu dinyatakeun geus beresih.

³⁸Boh lalaki boh awewe anu boga colat bodas dina kulit,

³⁹ku imam kudu dipariksa. Upama colat-colat bodasna lenang, eta ukur panyakit kulit biasa, jelemana tetep beresih.

⁴⁰Lalaki anu buukna maruragan nepi ka tarangna atawa sirah tukangna lenang, henteu matak najis.

⁴¹

⁴²Tapi upama dina bolenangna tea aya pitak-pitak bodas semu beureum, eta lepra.

⁴³Kudu dipariksakeun ka imam. Upama aya korengan anu warnana semu beureum,

⁴⁴eta tetela lepra anu ngamimitianana dina sirah. Ku imam kudu dinyatakeun najis.

⁴⁵Jelema anu katerap kasakit lepra, barang pakena kudu anu rubat-rabet, buukna teu meunang disisiran, jeung kudu nutupan beungeut beulah handap, sarta kudu ceceluk, ”Najis! Najis!”

⁴⁶Sapanjang kasakitna tacan cageur mah dirina tetep najis, hirupna kudu mencil di luareun pasanggrahan, teu meunang campur jeung nu sejen.

⁴⁷Upama dina pakean-pakean aya tanda buluk, boh pakean tina lawon wol, boh tina lawon kaci,

⁴⁸atawa dina barang kulit atawa sakur barang tina kulit,

⁴⁹upama eta tanda buluk warnana geus semu hejo atawa semu beureum, eta tanda yen bulukna geus mimiti nemen, barangna kudu ditembongkeun ka imam.

⁵⁰Ku imam kudu diilikan, terus singkurkeun tujuh poe.

⁵¹Dina poe katujuhna ku imam kudu diilikan deui. Upama tanda bulukna ngalegaan, eta barang jadi najis.

⁵²Ku imam kudu diduruk sabab bulukna bisi nerekab, jadi kudu diduruk ku seuneu sina beak.

⁵³Tapi upama buluk tea dina eta barang henteu ngalegaan,

⁵⁴ku imam kudu dititah dikumbah heula tuluy disingkurkeun tujuh poe deui.

⁵⁵Tuluy diilikan deui. Lamun warna bulukna henteu robah, sanajan teu ngalegaan eta barang masih keneh najis. Boh bulukna teh beulah luar boh beulah jero, eta barang kudu diduruk.

⁵⁶Tapi saupama tas diilikan deui bulukna teh siga geus rek leungit, barangna boh lawon boh kulit kudu disoehkeun.

⁵⁷Saupama geus kitu bulukna aya deui jeung ngalegaan, eta barang ku nu bogana kudu diduruk.

⁵⁸Upama eta buluk bisa leungit ku dikumbah, kumbah deui bae barangna ambeh beresih.

⁵⁹Kitu papakon ngeunaan hal buluk dina papakean atawa lawon boh tina wol atawa kaci, atawa dina barang naon bae anu dijieun tina kulit.