Read Boros Dusun IMAMAT 7 Bible Online

IMAMAT 7 - Boros Dusun bible

IMAMAT 7

¹Ieu aturan kurban kasalahan. Aturanana suci.

²Pikurbaneunana peuncit di tempat paranti meuncit sato kurban beuleuman, nya eta di kalereun altar, sarta getihna kudu disiramkeun kana opat pongpok altar.

³Gajihna kabeh ala kana altarkeun, nya eta gajih buntut, gajih jeroan,

⁴giginjel duanana jeung gajihna, jeung babagian ati anu pangalusna.

⁵Beuleum gajihna kabeh ku imam dina altar, jieun kurban kadaharan haturan PANGERAN. Eta kurban kasalahan.

⁶Kulawarga imam anu lalaki kabeh kudu milu ngadahar eta daging kurban. Didaharna kudu di tempat anu suci, sabab eta kadaharan teh suci.

⁷Boh pikeun kurban pamupus dosa boh pikeun kurban kasalahan, aya katangtuanana, nya eta dagingna pikeun imam anu ngurbankeun.

⁸Sato kurban beuleuman kulitna pikeun imam anu ngurbankeun.

⁹Tiap kurban kadaharan, boh anu meunang meuleum boh anu digoreng atawa didadar, eta pikeun imam anu ngurbankeun.

¹⁰Kurban kadaharan anu henteu diasakan, boh nu make minyak boh nu tuhur, eta pikeun para imam turunan Harun, bagikeun sing walatra di antara maranehna.

¹¹Ieu aturan hal nyanggakeun kurban panarima ka PANGERAN.

¹²Anu nyieun kurban panarima tanda rasa sukur ka Allah, jaba ti ngurbankeun sato kudu ngahaturkeun roti anu teu diragi. Rotina meunang anu kandel anu diadonan ku minyak jetun, meunang anu ipis anu diulasan ku minyak jetun, atawa kueh-kueh anu diadonanana ku minyak jetun,

¹³jeung beuleum roti anu teu diragi.

¹⁴Tina tiap eta kadaharan ku manehna kudu dibaktikeun sabagian ka PANGERAN; eta teh jadi bagian pikeun imam anu nyiramkeun getih sato kurban kana altar tea.

¹⁵Daging kurbanna kudu beak didahar poe eta keneh, poe dikurbankeunana, teu meunang disesakeun nepi ka isuk.

¹⁶Kurban panarima ti jelema anu maksudna nekanan nadar, atawa pedah kajurung ku niat sorangan, dagingna kudu didahar poe eta keneh, poe dikurbankeunana; upama teu beak, meunang diisukkeun.

¹⁷Tapi lamun nepi ka pagetona aya keneh, kudu diduruk masing beak.

¹⁸Sabab lamun geus tilu poe didahar keneh bae, kurbanna ku PANGERAN moal ditampi jeung moal matak jadi berkah ka manehna, malah haram sarta bakal aya balukarna ka anu ngadahar.

¹⁹Upama eta daging kakeunaan ku nu najis, teu meunang didahar, kudu diduruk. Saha bae meunang milu ngadahar asal dirina teu kanajisan.

²⁰Sing saha anu dirina keur kanajisan seug ngadahar eta, teu meunang diaku deui umat Allah.

²¹Kitu deui jelema anu tas nyabak barang najis, boh najis nu asal ti jelema boh anu asal ti sato, lamun ngadahar eta daging kurban teu meunang diaku deui umat Allah.

²²PANGERAN ka Musa ngandikakeun deui aturan

²³pikeun urang Israil. Urang Israil teu meunang ngadahar gajih sapi, domba atawa embe.

²⁴Gajih sato anu paeh sorangan atawa paeh lantaran ditekuk sato galak, teu meunang didahar tapi bisa dipake pikeun kaperluan sejen.

²⁵Anu ngadahar gajih sato anu bisa dijieun kurban kadaharan haturan PANGERAN, teu meunang diaku deui umat Allah.

²⁶Urang Israil di mana bae teu meunang nyieun dahareun tina getih manuk atawa sato lianna.

²⁷Anu ngalanggar teu meunang diaku deui umat Allah.

²⁸PANGERAN ngandikakeun ieu aturan ka Musa

²⁹pikeun urang Israil. Saha-saha anu boga kurban panarima, sabagian kurbanna hususkeun haturan PANGERAN.

³⁰Kurban kadaharanana sanggakeun ku leungeun sorangan. Gajih jeung dada sato kurbanna haturkeun ka PANGERAN, jadi pangbakti husus.

³¹Gajihna ku imam kudu diduruk dina altar, dadana pikeun para imam.

³²Pingping tukangna anu katuhu husus dermakeun

³³ka imam anu ngurbankeun getih jeung gajih eta kurban panarima.

³⁴Dadana jadi pangbakti husus, ari pingping tukangna nu katuhu ku PANGERAN geus ditangtukeun ka urang Israil pikeun didermakeun ka para imam. Eta kitu anu ku urang Israil kudu dibikeun ka imam-imam, salilana.

³⁵Kitu bagian Harun sapala putra tina sagala kurban anu dihaturkeun ka PANGERAN, anu diandikakeun dina poean aranjeunna diangkat.

³⁶Harita PANGERAN nimbalan ka urang Israil yen kudu mere bagian saperti kitu ka aranjeunna. Ieu katangtuan ku urang Israil kudu dilakonan saterusna.

³⁷Kitu aturan-aturan hal kurban beuleuman, kurban kadaharan, kurban pamupus dosa, kurban kasalahan, kurban pangistrenan, jeung kurban panarima.

³⁸Kitu timbalan PANGERAN ka Musa di Gunung Sinai di tanah gurun, dina poean anjeunna ngembarkeun aturan-aturan kurban pikeun urang Israil.