Read Boros Dusun YERMIA 46 Bible Online

YERMIA 46 - Boros Dusun bible

YERMIA 46

¹Aya timbalan PANGERAN ka kaula, ngeunaan bangsa-bangsa.

²Anu pangheulana ku Mantenna disebat nya eta Mesir. Kieu timbalana-Na hal balad raja Mesir Piraon Neko, anu eleh perangna di Karkemis deukeut Walungan Eprat, eleh ku Raja Nebukadnesar ti Babul, dina taun kaopat mangsa Yoyakim putra Yosia jadi raja di Yuda,

³”Para perwira Mesir ngahucuhkeun balad, ’Siapkeun tameng-tameng maraneh, maju ka medan jurit!

⁴Kuda-kuda selaan, tumpakan! Geura sup kana barisan, pake balakutak! Asah tumbak! Pake baju beusi!’ ”

⁵”Tapi naon anu katingali ku Kami?” lahiran PANGERAN. ”Bet malundur mani tagiwur, baladna kadeseh, perangna eleh, lalumpatan tingbalecir, kalabur bawaning gimir. Teu waranieun ngalieuk-lieuk acan.

⁶Tapi kaburna teu bisa kebat, bororaah bisa ngejat. Di kaler, deukeut Walungan Eprat, blag-blug lalabuh patingjaloprak.

⁷Saha eta anu mangkak, lir Walungan Nil keur beungkak, lir walungan nu keur limpas?

⁸Geuning Mesir, lir Walungan Nil keur caah, lir walungan limpas caina. Mesir susumbar, ’Aing arek ngagulidag, saalam dunya arek dijorag. Kota-kotana baris digempur, jelemana sina tumpur.

⁹Lumpatkeun pasukan kuda, geredegkeun pasukan kareta. Hucuhkeun pasukan tempur: tentara bangsa Sudan jeung Libia anu marake tameng, jeung tentara ti Lidia anu arahli mentang gondewa.’ ”

¹⁰Poe ieu kagungan Nu Maha Agung, PANGERAN Nu Maha Kawasa. Poe ieu Mantenna seja ngabales, musuh-musuh bakal ditindes. Pedang-Na bakal seubeuh ku daging musuh, seubeuh nguyup getih musuh. Poe ieu Mantenna ngarecah korban-korban, di kaler, di sisi Walungan Eprat.

¹¹Eh urang Mesir, geura ka Gilad, neangan keur piubareun! Ubar-ubar maraneh geus teu mental, maneh hamo cageur-cageur.

¹²Bangsa-bangsa nyarahoeun yen maneh meunang wiwirang, ngadarengeeun maneh ngajerit. Serdadu-serdadu silih tubruk pada batur, tinggedebug tinggolepak kana taneuh.

¹³Raja Nebukadnesar ti Babul sumping rek ngagempur Mesir. Ti dinya PANGERAN nimbalan ka sim kuring,

¹⁴”Uarkeun ka unggal kota di Mesir, Migdol, Mempis jeung Tahpanes. Kieu, ’Geura taki-taki ngabela diri, maraneh moal teu tumpes ku perang!

¹⁵Dewa maraneh, Dewa Apis nu kawasa, na ku naon ngalumbuk? Ditarajang ku PANGERAN nepi ka ngusruk!’

¹⁶Serdadu maraneh patingkudupruk, seug silih ajak pada batur, ’Geuwat, mending mulang, kumpul jeung sanak baraya, nyingkiran pedang musuh!’

¹⁷Ganti ngaran raja Mesir teh, ku ’Si Ribut Gede Omong Nu Teu Nenjo Kasempetan’.

¹⁸Kami Raja mah, PANGERAN Nu Maha Kawasa, Allah anu jumeneng. Kadigjayaan rongkah nu bakal numpes maraneh, lir Gunung Tabor ngajurungkunung ngaluhuran gunung-gunung, lir Gunung Karmel ngajegir ngaluhuran laut.

¹⁹Sadiakeun diri maraneh, eh urang Mesir, geusan diboyong. Kota Mempis bakal kosong, parongpong euweuh jelemaan.

²⁰Mesir lir sapi montok diseureud ku engang ti kaler.

²¹Serdadu-serdadu bayaranana ge badis anak sapi taya guam, tarungna moyodok kumeok, kalabur tingbalecir. Dasar geus ninggang kana cilakana, geus ninggang kana ancurna.

²²Barang jebul musuh ngurunyung, Mesir kabur, sorana mani hoshosan kawas oray. Musuhna ngambreg mubat-mabit kampak, mani kawas nu nuaran tatangkalan,

²³badis keur ngabukbak leuweung. Baladna loba teuing lamun diitung. leuwih loba batan simeut.

²⁴Urang Mesir bati getir, eleh perang ku musuh ti tatar kaler. Kitu timbalan Kami, PANGERAN.”

²⁵Timbalan PANGERAN Nu Maha Kawasa, Allah Israil, ”Kami rek nyiksa si Amon, dewa anu ngajentul di Tebe, sakalian jeung Mesir katut dewa-dewana jeung raja-rajana. Raja Mesir rek dicerek katut sakabeh jelema anu nyalindung ka manehna.

²⁶Rek diselehkeun ka jelema-jelema anu keur ngarah patina, nya ka Raja Nebukadnesar jeung pasukan baladna. Tapi engke ka hareup Mesir teh bakal loba deui pangeusina cara baheula bihari. Kitu timbalan Kami, PANGERAN.”

²⁷”Eh umat Kami, tong salempang, eh urang Israil, tong hariwang. Maraneh tangtu dijait, diala ti anu jauh, ti nagri tempat maraneh ditawan ku musuh. Bakal marulang ka lemah cai, bari hirup senang ati, moal aya pikasalempangeun, moal manggih pikarisieun.

²⁸Tangtu ku Kami dilayad disalametkeun. Bangsa-bangsa anu ku Kami dipake tempat ngabuang maraneh rek dibasmi. Tapi maraneh mah baris salamet. Ari dihukum mah dihukum maraneh teh, tapi ngahukum ge Kami mah adil. Kitu timbalan Kami, PANGERAN.”