Read Boros Dusun TANGIS YERMIA 5 Bible Online

TANGIS YERMIA 5 - Boros Dusun bible

TANGIS YERMIA 5

¹Nun PANGERAN, sing emut ka nu karandapan ku abdi-abdi. Tingali kahinaan abdi sadaya.

²Harta milik abdi-abdi dikawasaan ku jalmi-jalmi sanes, rorompok dicicingan ku jalmi-jalmi urang asing.

³Para bapa parantos maraot ku musuh, indung-indung ayeuna jaradi randa.

⁴Cai kangge nginum kedah dibayar, kayu kangge suluh kedah dipeser.

⁵Abdi-abdi dipaksa digawekeun sapertos kalde atanapi onta, cape ge teu kenging ngaso.

⁶Malar tedaeun cekap kangge hirup, abdi-abdi indit jajaluk ka Mesir sareng ka Asur.

⁷Karuhun nu gaduh dosana, parantos maraot, abdi-abdi nu nandangan sangsarana.

⁸Abdi-abdi diparentah ku jalmi-jalmi anu teu langkung ti harkat badega, nanging teu aya nu tiasa ngaleupaskeun abdi-abdi tina cangkinganana.

⁹Di luar kota tingalider tukang-tukang maehan, upami abdi-abdi nyiar tedaeun, nyawa taruhanana.

¹⁰Perbawa lapar, awak jadi nyongkab panas ku muriang, kulit ge panas sapertos anglo.

¹¹Bojo-bojo diperkosa di Gunung Sion pisan, di tiap desa di Yudea, mojang-mojang dipaksa masrahkeun kahormatanana.

¹²Para pamingpin ditarangkepan, teras digarantung. Para sepuh teu diajenan.

¹³Para jajaka dipaksa kedah ngagiling gandum saperti abid. Barudak leutik tingjarigjeug manggulan kayu anu bareurat.

¹⁴Kolot-kolot tara deui dariuk di gapura kota, barudak ngora tara deui maen musik.

¹⁵Kabagjaan abdi-abdi parantos musna tina kahirupan; igel abdi-abdi gentos jadi kanalangsaan.

¹⁶Sugri nu jadi kareueus parantos teu araya. Abdi-abdi jadi cilaka ku margi parantos dosa.

¹⁷Gering sajeroning pikir, panon meh teu awas ningal, kahalangan ku cipanon,

¹⁸nalangsa ku Gunung Sion nu parongpong cunggelik sepi, ruruntuhanana jadi tempat laliarna anjing-anjing leuweung.

¹⁹Nanging nun PANGERAN, Gusti teh Raja abadi, nu murba salalanggengna.

²⁰Ku naon ngantunkeun abdi sadaya sakitu lamina? Kumaha, kersa upami Gusti mikaemut deui ka abdi sadaya?

²¹Wangsulkeun abdi sadaya, wangsulkeun ka pangkon Gusti, nun PANGERAN! Pulihkeun deui kamulyaan abdi-abdi sapertos kapungkur.

²²Atanapi bade tetep abdi-abdi dipiceun sapapaosna? Bade teras bendu teu aya watesna?