Read Boros Dusun YEHESKEL 25 Bible Online

YEHESKEL 25 - Boros Dusun bible

YEHESKEL 25

¹PANGERAN nimbalan ka kaula,

²timbalana-Na, ”Eh anak manusa, weweleh nagri Amon ku maneh.

³Bejakeun, darengekeun ieu timbalan Kami, PANGERAN Nu Maha Agung: Maraneh ngarasa puas nenjo Bait Kami dinistakeun, ngarasa puas nenjo nagri Israil diburak-barik, ngarasa puas nenjo urang Yuda digiring ka pangbuangan.

⁴Ku sabab maraneh geus mupuas kitu, maraneh ku Kami rek diselehkeun ka kaom-kaom ti gurun keusik beulah wetan. Maranehna bakal masang kemah-kemahna di nagri maraneh, tuluy maratuh. Maranehna nu bakal ngadahar bubuahan jeung nginum susu anu kuduna jang maraneh.

⁵Ibukota Raba ku Kami rek dijieun pakandangan onta, kota-kota urang Amon rek dijieun pakandangan domba, sangkan maraneh nyararaho yen Kami teh PANGERAN.”

⁶Kieu timbalan PANGERAN Nu Maha Agung, ”Maneh mani keprok jeung jijingkrak bawaning ku atoh. Maneh mupuas ka nagri Israil.

⁷Ku sabab eta, maneh ku Kami rek diselehkeun ka bangsa-bangsa, sina dijarah. Maneh ku Kami bakal ditumpes sama sakali, nepi ka moal deui jadi bangsa, moal deui boga nagri akuan. Kakara engke maneh nyaho yen Kami teh PANGERAN.”

⁸PANGERAN nimbalan, ”Ku sabab Moab geus nyebutkeun urang Yuda ge sarua jeung bangsa-bangsa sejen,

⁹kota anu jadi benteng wates nagri Moab ku Kami rek disina aya nu ngagempur, malah katut kota-kota anu pangendahna, Bet Yesimot, Baal Meon jeung Kiryataim.

¹⁰Moab ku Kami rek disina eleh bareng jeung Amon ku kaom-kaom ti gurun keusik beulah wetan, nepi ka Moab moal deui jadi bangsa.

¹¹Moab tangtu ku Kami dihukum, sangkan nyaraho yen Kami teh PANGERAN.”

¹²PANGERAN Nu Maha Agung nimbalan, ”Urang Edom geus ngabales ka urang Yuda kacida telengesna. Eta pangbales ngajadi hiji kasalahan anu manjang.

¹³Kami mere nyaho, Edom geus tangtu bakal dihukum, jelema-jelemana jeung sato-satona tangtu ku Kami bakal ditumpes. Ku Kami rek disina suwung ti semet kota T’eman nepi ka kota Dedan, jelema-jelemana sina paraeh ku perang.

¹⁴Umat Kami Israil sina mangmaleskeun Kami ka Edom. Urang Edom ku maranehna bakal disina ngarasa hebatna amarah Kami. Edom sina nyahoeun kumaha rasana nampa wawales ti Kami.” Kitu timbalan PANGERAN Nu Maha Agung.

¹⁵PANGERAN Nu Maha Agung nimbalan, ”Urang Pelisti geus ngabales kacida telengesna ka musuh kabuyutanana, numpes ku ceuceub-ceuceubna.

¹⁶Ku sabab eta Kami mere nyaho, urang Pelisti ku Kami tangtu bakal digempur, disapu dibuburak. Jelema-jelemana anu caricing di Dataran Pelisti tangtu ku Kami dibasmi.

¹⁷Tangtu dihukum dibales bebeakan. Sina ngarasa amarah Kami, sina nyarahoeun yen Kami teh PANGERAN.”