Read Boros Dusun YEHESKEL 30 Bible Online

YEHESKEL 30 - Boros Dusun bible

YEHESKEL 30

¹PANGERAN nimbalan deui.

²”Eh anak manusa,” timbalana-Na, ”geura ngaramal sarta umumkeun ieu timbalan Kami. Ucapkeun ieu ucapan-ucapan sing tarik: Tereh datang poe nu matak gimir!

³Poena tereh tumiba, pikeun tindakan PANGERAN: langit mendung, bangsa-bangsa bakal susah.

⁴Mesir bakal ngarandapan perang. Sudan nandangan kasukeran. Di Mesir bakal loba nu diparaehan. Eta nagri bakal diranjah. Runtuh jadi ruruntuk.

⁵Serdadu-serdadu sewaan ti Sudan, Lidia, Libia, Arab, Kub, malah nu asal ti umat Kami, eta oge tangtu tariwas dina eta perang.”

⁶PANGERAN Nu Maha Agung nimbalan, ”Ti semet Migdol di beulah kaler nepi ka Aswan di beulah kidul, sakabeh anu ngabela Mesir tangtu tariwas tengahing jurit. Angkatan perang Mesir anu dipiagul tangtu tumpur. Kitu timbalan Kami, PANGERAN Nu Maha Agung.

⁷Eta nagri bakal jadi tempat anu pangsepi-sepina di dunya, kota-kotana bakal tumpur sama sakali.

⁸Saupama Mesir ku Kami geus der dihuru sarta anu ngabelana geus paraeh, maranehanana bakal nyaraho yen Kami teh PANGERAN.

⁹Lamun geus ninggang mangsana sarta Mesir geus tumpur, Kami baris ngiangkeun utusan-utusan tarumpak kapal, geusan ngageretak urang Sudan anu teu boga panyangka. Tangtu maranehanana galimir. Waktuna geus tereh!”

¹⁰PANGERAN Nu Maha Agung nimbalan, ”Raja Nebukadnesar, raja nagri Babul, ku Kami rek dipake geusan meakkeun kakayaan Mesir.

¹¹Eta nagri tangtu didatangan ku manehna jeung baladna anu taya rasrasan, tuluy ditumpurkeun. Mesir ku maranehna bakal digempur ku pedang, tanahna bakal pinuh ku bangke.

¹²Walungan Nil ku Kami rek disaatan, Mesir rek diselehkeun kana kakawasaan jalma-jalma anu doraka. Sakuliah nagrina bakal diancurkeun ku bangsa sejen. Kitu timbalan Kami, PANGERAN.”

¹³PANGERAN Nu Maha Kawasa nimbalan, ”Brahala-brahala sesembahan jeung dewa-dewa di Mempis rek dibasmi. Mesir moal boga deui pamingpin, jelema-jelemana sina pinuh ku kasieun.

¹⁴Pakidulan tanah Mesir rek dijadikeun tempat sepi, kota Soan di kaler arek dihuru. Tebe, ibukotana, arek dihukum.

¹⁵Kota Sin, benteng Mesir anu gede, sina ngarasa amarah Kami. Kakayaan Tebe bakal ditumpurkeun.

¹⁶Mesir bakal dihuru ku Kami, Sin bakal nandangan kanyeri anu pohara. Tembok Tebe rek direbahkeun, kotana dibedah.

¹⁷Jajaka-jajaka kota On jeung kota Pi-Beset bakal tariwas ku perang, nu sejen-sejenna ditawan.

¹⁸Saupama kakawasaan Mesir ku Kami geus dirubuhkeun sarta kakuatanana anu dipiagul geus tumpur, di Tahpanhes bakal poek mongkleng. Mesir bakal katutup ku mega, rahayatna di saban kota bakal jaradi tawanan.

¹⁹Saupama Mesir geus dihukum saperti kitu ku Kami, kakara bakal nyaraho yen Kami teh PANGERAN.”

²⁰Dina tanggal tujuh bulan kahiji, nincak sabelas taun hirup di nagri buangan, sim kuring ditimbalan ku PANGERAN.

²¹”Eh anak manusa,” timbalana-Na, ”leungeun raja Mesir geus dipotongkeun, taya pisan anu mangbeberankeun atawa mere pangais keur ngais leungeunna sangkan bisa cageur, sangkan bisaeun deui ngangkat pedang.

²²Ayeuna kieu timbalan Kami, PANGERAN Nu Maha Agung: Raja Mesir musuh Kami. Leungeunna, boh anu walagri keneh, boh anu geus potong, rek dipotongkeun duanana, pedangna sina ragrag tina genggemanana.

²³Urang Mesir rek disina paburencay ka sakuliah dunya.

²⁴Sabalikna Kami rek neguhkeun leungeun raja Babul, sina ngagenggem pedang Kami. Leungeun raja Mesir rek dipotongkeun, sina gegerungan nepi ka paeh hareupeun musuhna.

²⁵Geus tangtu pisan eta raja teh ku Kami ditumpeskeun tanagana, sabalikna raja Babul mah ku Kami rek dikuatkeun. Saupama pedang Kami geus diserenkeun ka raja Babul, sarta ku manehna geus diacung-acung ka Mesir, unggal jalma bakal nyaho yen Kami teh PANGERAN.

²⁶Urang Mesir rek disina paburencay ka sakuliah dunya. Sanggeus kitu maranehna bakal nyaho yen Kami teh PANGERAN.”