Read Boros Dusun YEHESKEL 9 Bible Online

YEHESKEL 9 - Boros Dusun bible

YEHESKEL 9

¹Geus kitu Allah ngagentra tarik, ”Hiap! Maraneh anu kudu ngahukum ieu nagri, geura ka darieu. Bawa pakarang!”

²Harita keneh datang genep jelema ti luareun gapura kaler Bait Allah, masing-masing mawa pakarang. Daratangna jeung hiji jelema anu pakeanana tina lawon linen jeung mawa parabot tulis. Tuluy narangtung deukeut altar parunggu.

³Bray aya cahaya kamulyaan Allahna Israil gumebyar. Ti lebah mahluk-mahluk jangjangan anu araya dina urutna bareto, eta cahaya teh mumbul, terus pindah kana bangbarung panto Bait Allah. Ti dinya PANGERAN nyaur jelema anu pakeanana lawon linen tea.

⁴Timbalana-Na, ”Ideran sakuliah kota Yerusalem. Unggal jelema anu kapanggih prihatin jeung susah ku ayana kalakuan-kalakuan anu pikagirukeun di ieu kota, ku maneh kudu dicirian.”

⁵Karungu deui Allah nimbalan ka nu sejen-sejenna, ”Maraneh kudu milu ngideran ieu kota, maehan jelema-jelema. Ulah aya anu diiwalkeun. Ulah aya karunya ka saurang oge.

⁶Kolot, jajaka, parawan, indung, barudak leutik, paehan bae. Tapi poma ulah ngagadabah ka jelema anu aya ciri dina tarangna. Pek mimiti ti dieu, ti Bait Kami.” Prak maranehna ngamimitian, ka para kokolot anu keur araya di jero Bait Allah.

⁷Allah nimbalan deui ka maranehna, ”Bait teh najiskeun. Pinuhan buruanana ku bangke. Geura prak!” Prak deui maranehna mimiti maraehan jelema-jelema anu araya di jero kota.

⁸Sabot jelema-jelema keur diparaehan, kaula aya di dinya, nyorangan. Bruk sim kuring sujud kana taneuh bari ngajerit, ”Duh PANGERAN Nu Maha Agung, ku naon dugi ka sakitu benduna ka Yerusalem, dugi ka eta sesa urang Israil teh tiap jalmi ditumpes?”

⁹Allah ngawaler, ”Dosa urang Israil jeung urang Yuda kacida gedena. Di sakuliah nagri maranehna geus maraehan. Yerusalem geus kacida kotorna ku kajahatan maranehna. Aromongna, Kami, PANGERAN, geus euweuh ti nagrina, hamo ningali kana kalakuanana.

¹⁰Ku Kami dibales satimpal jeung kalakuanana ka batur. Kami moal rek mikarunya.”

¹¹Geus kitu jelema anu pakeanana lawon linen tea datang ngadeuheus, tuluy miunjuk, ”Timbalan Gusti parantos dijalankeun.”