Read Boros Dusun YOEL 3 Bible Online

YOEL 3 - Boros Dusun bible

YOEL 3

¹PANGERAN ngandika, ”Mangsa eta, Yuda jeung Yerusalem ku Kami rek disina mukti deui.

²Kami rek ngumpulkeun bangsa-bangsa, rek digiring ka Lebak Pangadilan. Di dinya, sagala kalakuanana ka umat Kami rek diadilan. Maranehna geus ngacak-ngacak urang Israil, dibacacarkeun di nagri-nagri sejen, jeung geus ngabagi-bagi Israil, tanah Kami.

³Maranehna ngalung dadu, ngundi saha nu bakal meunang tawanan. Barudak awewe lalaki dijarual, dijieun budak beulian, duitna dipake lacur jeung meuli inuman.

⁴Rek dijieun kumaha Kami ku maraneh, eh Tirus, Sidon, jeung wilayah Pelisti sakuliahna? Maraneh rek males pulih ka Kami? Lamun enya kitu, Kami ge baris gancang ngabales deui ka maraneh.

⁵Maraneh geus ngarampasan perak jeung emas milik Kami, sarta ngakut harta kakayaan Kami ka kuil-kuil maraneh.

⁶Maraneh geus ngaboyong urang Yuda jeung urang Yerusalem, dijauhkeun ti nagrina sorangan sarta dijarual ka urang Yunani.

⁷Ayeuna ku Kami rek dicokot deui ti dinya, ti tempat dijualna. Kalakuan maraneh ka maranehna ku Kami rek dibales.

⁸Anak maraneh, awewe, lalaki, ku Kami rek dijual ka urang Yuda, sarta ku maranehna baris dijarual deui ka nu jauh, ka urang Syeba. Kami, PANGERAN, geus ngandika.

⁹Embarkeun kieu ka sakabeh bangsa: ʼGeura tatan-tatan perang, panggil prajurit-prajurit, kumpulkeun serdadu-serdadu, terus maju!

¹⁰Mata-mata wuluku jieunan pedang, peso-peso pangkas jieunan tumbak. Nu halengker oge kudu milu jurit.

¹¹Eh bangsa-bangsa sakurilingna, masing gancang dararatang, karumpul di ditu di lebak.ʼ ” Nun PANGERAN, kintunkeun balad Gusti, sina narajang ka maranehna.

¹²”Eta bangsa-bangsa sina tatan-tatan, sina maruru ka Lebak Pangadilan. Di dinya Kami, PANGERAN, baris ngaadilan bangsa-bangsa nu araya di sakurilingeun umat Kami.

¹³Maranehna pohara jarahatna. Babad rubuh cara ngababad gandum dina usum panen, giles ancur cara ngagiles buah anggur anu mucung dina pameresan, nepi ka cai anggurna mudal.

¹⁴Mangrebu-rebu lobana nu araya di Lebak Pangadilan. Nya di dinya poena PANGERAN bakal gancang-gancang datang.

¹⁵Panonpoe jeung bulan jadi poek, bentang-bentang pareum cahayana.”

¹⁶PANGERAN ngagaur ti Gunung Sion, gentra-Na ngageleger ti Yerusalem, bumi jeung langit aringgeung. Tapi umat-Na mah baris diraksa.

¹⁷”Maneh, Israil, mun geus kitu bakal nyaho, yen Kami teh PANGERAN, Allah maraneh, Kami jumeneng di Sion, gunung Kami anu suci. Yerusalem bakal jadi kota suci, moal karebut deui ku bangsa sejen.

¹⁸Mangsa eta, gunung-gunung bakal katutup ku kebon anggur, pasir-pasir pinuh ku ingon-ingon, di sakuliah Yuda bakal loba cai. Hiji walungan bakal ngocor ti Bait Allah PANGERAN nyaian Lebak Akasia.

¹⁹Ari Mesir bakal jadi gurun keusik, Edom bakal burakrakan taya jalmaan, lantaran maranehna geus narajang nagri Yuda, jeung maehan rahayat anu teu salah.

²⁰Kami rek mangmaleskeun sakur anu geus diparaehan, nu maraehanana moal dihirupan.

²¹Tapi Yuda jeung Yerusalem salawasna bakal aya pangeusina, sarta Kami, PANGERAN, baris matuh di Gunung Sion.”