Read Boros Dusun YUNUS 1 Bible Online

YUNUS 1 - Boros Dusun bible

YUNUS 1

¹Hiji mangsa PANGERAN nimbalan ka Yunus putra Amitai.

²Timbalana-Na, ”Maneh kudu indit ka Ninewe, kota nu gede tea. Ancam urang dinya, sabab Kami nyaho kalakuan maranehna nu kacida gorengna.”

³Tapi Yunus anggur angkat ka tujuan anu sabalikna. Angkatna teh ka Yopa. Maksudna geusan nyingkiran PANGERAN. Di dinya aya kapal nu rek ka Sepanyol. Sanggeus mayar ongkos jalan, anjeunna unggah bareng jeung urang kapal, terus balayar ka nagara Sepanyol, sangkan jauh ti PANGERAN.

⁴Tapi PANGERAN ngadatangkeun angin ribut di laut, topan kacida gedena nepi ka kapal meh bejad.

⁵Matros-matros garugup, tuluy sasambat marenta tulung ka dewana masing-masing. Geus kitu muatan kapal dibalang-balangkeun ka laut, pikeun ngurangan pibahlaeun. Ari Yunus mah harita teh kulem tibra pisan di bagian handap.

⁶Kapanggih ku nangkoda, sarta ceuk eta nangkoda ka Yunus, ”Naha kalah ka sare? Hudang, sasambat ka dewa anjeun menta pitulung. Malakmandar aya piwelasna ngajait urang tina baya pati.”

⁷Matros-matros ngaromong pada batur, ”Urang lotrekeun, supaya kanyahoan saha nu jadi gara-gara nepi ka urang nyorang ieu bahla.” Sanggeus dilotre, lotrena keuna ka jenengan Yunus.

⁸Ku sabab eta ceuk maranehna ka anjeunna, ”Cobi wakcakeun, leres ieu teh gara-gara anjeun? Bade naon aya di dieu? Anjeun asal ti mana? Bangsa naon?”

⁹Waler Yunus, ”Kaula urang Ibrani. Kaula ngabakti ka PANGERAN, Allah nu jumeneng di sawarga, nu ngadamel daratan jeung lautan.” Saterusna anjeunna nerangkeun yen keur minggat ti PANGERAN.

¹⁰Matros-matros jadi kacida sarieuneunana, pok ngaromong ka anjeunna, ”Ku naon anjeun nepi ka wani kitu?”

¹¹Ari topan beuki tambah jadi, seug matros-matros teh naranya ka anjeunna, ”Kedah dikumahakeun anjeun teh supaya ieu topan eureun?”

¹²Nabi Yunus ngawaler, ”Alungkeun kaula ka laut, engke laut leler. Sabab kaula nu jadi lantaran aranjeun katarajang topan sakieu rosana teh.”

¹³Tapi urang kapal teh anggur haben bae ngadayung, nyoba nyisikeun kapal ka basisir. Tapi gaplah kawantu topan beuki ngamuk.

¹⁴Ku sabab kitu maranehna sasambat ka PANGERAN, ”Duh PANGERAN, mugi abdi-abdi sadaya ulah dihukum dugi ka tiwas, wireh abdi-abdi kapaksa kedah ngorbankeun ieu jalmi! Ieu perkawis disanggakeun ka Anjeun, nun PANGERAN, margi ieu sadaya pangersa Anjeun.”

¹⁵Geus kitu Yunus ku maranehna digotong, tuluy dialungkeun ka laut. Rep laut leler harita keneh.

¹⁶Matros-matros jadi kacida sarieuneunana ku PANGERAN, nepi ka ngurban sarta jangji seja ngabakti ka Mantenna.

¹⁷Ku kersaning PANGERAN, Yunus dilegleg ku lauk gede. Tilu poe tilu peuting anjeunna aya di jero beuteung eta lauk.