Read Boros Dusun BILANGAN 10 Bible Online

BILANGAN 10 - Boros Dusun bible

BILANGAN 10

¹PANGERAN ngandika deui ka Musa,

²”Kudu nyieun dua tarompet tina perak ketokan pikeun nyalukan jelema-jelema sina karumpul, jeung pikeun tangara kudu ngaruag pasanggrahan.

³Upama ditiup duanana sarta sorana panjang, hartina jalma-jalma kudu kumpul kabeh ka maneh di hareupeun lawang ka Kemah Kami.

⁴Upama ditiup hiji bae, hartina anu kudu kumpul teh ngan para pamingpin kaom wungkul.

⁵Sora pondok tangara kaom-kaom beulah wetan kudu indit.

⁶Lamun sora pondok ditiup kadua kalina, tangara pasukan beulah kidul kudu indit. Jadi soara anu parondok teh tangara umat kudu arindit,

⁷ari sora panjang tangara kudu karumpul.

⁸Tarompet ditiupna kudu ku imam, anak-anak Harun. Kitu aturan anu kudu diturut salilana.

⁹Saupama engke tanah maraneh katarajang perang, geusan ngabela diri ti musuh anu ngarurug, eta dua tarompet tiup geusan tangara ngahucuhkeun jurit. Kami, PANGERAN Allah maraneh tangtu baris nulungan nyalametkeun maraneh ti leungeun musuh.

¹⁰Kitu deui dina musim-musim kasukaan, dina Pesta Bulan Anyar, jeung dina pesta-pesta kaagamaan lianna, ana maraneh nyaranggakeun kurban beuleuman jeung kurban panarima, eta dua tarompet kudu ditiup. Tan wande Kami mere pitulung ka maraneh. Kami teh PANGERAN Allah maraneh.”

¹¹Dina tanggal dua puluh bulan kadua taun kadua ti barang urang Israil budal ti Mesir, mega luhureun Kemah PANGERAN teh unggah.

¹²Seug urang Israil nungtutan arindit ninggalkeun Gurun Keusik Sinai. Ari mega tea ngarandeg di palebah tanah gurun Paran.

¹³Mimiti arinditna teh kalawan timbalan PANGERAN ka Musa,

¹⁴sarta saban waktu indit aturanana sarua. Anu maju pangheulana nya eta aleutan pasukan umbul-umbul pingpinan kaom Yuda, sapasukan-sapasukan, dikapalaan ku Nahson bin Aminadab.

¹⁵Netanel bin Suar ngapalaan aleutan kaom Isaskar,

¹⁶Eliab bin Helon ngapalaan aleutan kaom Sebulun.

¹⁷Geus kitu Kemah Suci diruag tuluy digotong ku kaom Gerson jeung kaom Merari, bral iang.

¹⁸Ditema ku iangan pasukan umbul-umbul kaom Rubin sapasukan-sapasukan, dikapalaan ku Elisur bin Sedeur.

¹⁹Selumiel bin Surisaday ngapalaan aleutan kaom Simeon,

²⁰jeung Elisap bin Rehuel ngapalaan aleutan kaom Gad.

²¹Leut deui iangan urang Lewi kaom Kahat, ngagarotong parabot-parabot suci. Lamun maranehanana geus daratang ka pasanggrahan anu anyar, eta Kemah kudu geus ngadeg deui.

²²Ti dinya ditema ku pasukan umbul-umbul kaom Epraim, saaleutan-saaleutan, dikapalaan ku Elisama bin Amihud.

²³Gamaliel bin Pedasur ngapalaan kaom Menase,

²⁴jeung Abidan bin Gidoni ngapalaan kaom Binyamin.

²⁵Pangpandeurina pasukan umbul-umbul kaom Dan, anu jadi bebenteng beulah tukang, dikapalaan ku Ahieser bin Amisaday.

²⁶Pegiel bin Okran ngapalaan aleutan kaom Aser,

²⁷jeung Ahira bin Enan ngapalaan aleutan kaom Naptali.

²⁸Kitu aturan tata barisna urang Israil, saaleutan-saaleutanana, ana maraju pindah pasanggrahan.

²⁹Geus kitu Musa ngalahir ka kapisaderekna, Hobab bin Yitro urang Midian, ”Ayeuna urang nuju ngawitan majeng ngajugjug tempat anu bade dipaparinkeun ku PANGERAN tea, kitu timbalan Mantenna anu parantos jangji bade maparin kamuktian ka urang Israil. Mangga urang sareng ka ditu, urang sasarengan hirup dina kamuktian.”

³⁰Walon Hobab, ”Hatur nuhun, nanging sim kuring teh hayang wangsul ka lembur sorangan.”

³¹”Panuhun, mugi ulah ngantunkeun,” saur Musa. ”Mugi kersa jadi tuduh jalan, da saderek mah uninga di mana pisaeeunana ieu aleutan kedah ngarerebna.

³²Saupami kersa nyarengan, sagala berkah PANGERAN urang tampi sasarengan.”

³³Sanggeus arindit ti Sinai ninggalkeun gunung PANGERAN, maranehna terus maju tilu poe. Peti Perjangjian PANGERAN geus ti heula diinditkeunana, salawasna heulaeun maranehanana pikeun nangtukeun pitempateun geusan masanggrahan deui.

³⁴Saban maranehna maju ninggalkeun urut pangrerebanana, mega aheng ti PANGERAN tea salawasna aya luhureunana ari ti beurang.

³⁵Saban Peti Perjangjian mimiti diinditkeun, Musa miunjuk, ”Mangga majeng nun PANGERAN, musuh-musuh paburisatkeun, sugri anu ka Gusti mikageuleuh perangan!”

³⁶Satiap-tiap eta eureun Musa miunjuk, ”Mangga linggih deui nun PANGERAN, ka ieu mangketi-keti urang Israil.”