Read Boros Dusun BILANGAN 28 Bible Online

BILANGAN 28 - Boros Dusun bible

BILANGAN 28

¹PANGERAN ngandika ka Musa,

²miwarang marentahkeun ka urang Israil yen kudu ngahaturkeun kurban-kurban kadaharan anu matak nyukakeun manah Allah, dina saban-saban waktu anu geus baku.

³Kurban-kurban kadaharan anu kudu dihaturkeun teh nya eta: kurban beuleuman, saban poe dua anak domba jalu umur sataun anu taya cacadna naon-naon.

⁴Dikurbankeunana isuk-isuk hiji, pabuburit hiji,

⁵tiap-tiapna kudu bari ngahaturkeun tipung sakilo anu diadonan ku saliter minyak jetun anu pangalusna.

⁶Kitu anu kudu dihaturkeun saban poe sarta kabeh kudu dibeuleum. Nya kurban kitu anu pangheulana dihaturkeun di Gunung Sinai teh, angseuna nyukakeun manah PANGERAN.

⁷Anak domba anu dikurbankeun isuk-isuk kudu jeung kurban anggur saliter, dikucurkeun kana altar.

⁸Sorena kurbankeun domba anu hiji deui cara kurban anu isuk-isuk, dibarengan ku cianggur. Eta oge kurban kadaharan, angseuna baris kagalih ku PANGERAN.

⁹Saban poe Sabat kudu ngurbankeun dua anak domba jalu umur sataun anu taya cacadna naon-naon. Kudu make kurban kadaharan, tipung dua kilo diadonan ku minyak jetun, jeung kurban anggur.

¹⁰Ieu kurban beuleuman dihaturkeunana kudu saban poe Sabat, jadi panambah kana kurban sapopoe, bareng jeung kurban cianggurna.

¹¹Unggal tanggal hiji tiap bulan kudu ngahaturkeun ka PANGERAN keur kurban beuleuman: dua sapi jalu ngora, hiji domba jalu, tujuh anak domba jalu anu sataunan, kabeh ulah aya cacad naon-naon.

¹²Pikeun kurban kadaharanana tipung diadonan ku minyak jetun, reana: tilu kilo pikeun tiap sapi, dua kilo pikeun domba,

¹³sakilo pikeun tiap anak domba. Ieu kabeh kurban beuleuman teh jadi kurban kadaharan, angseuna matak sedep ka PANGERAN.

¹⁴Kudu make kurban anggur, dua liter pikeun tiap sapi, saliter satengah pikeun tiap domba, saliter pikeun tiap anak domba. Kitu pikukuh kurban beuleuman unggal-unggal tanggal hiji saban bulan, sapanjang taun.

¹⁵Jeung pikeun panambah kana kurban beuleuman anu sapopoe, kudu ngurbankeun hiji embe badot pikeun kurban dosa make kurban anggur.

¹⁶Pesta Paska diayakeunana dina tanggal opat welas bulan kahiji, pikeun ngamulyakeun ka PANGERAN.

¹⁷Dina tanggal lima welasna kudu ngamimitian pesta kaagamaan anu lilana tujuh poe. Sajeroning kitu dahar teh kudu roti anu teu make ragi.

¹⁸Dina poean mimiti kudu ngadegkeun kumpulan ngabakti, jeung teu meunang digarawe.

¹⁹Kudu mupundutan ka PANGERAN kurban beuleuman anu dijieun kurban kadaharan, nya eta: dua sapi jalu ngora, hiji domba jalu, jeung tujuh anak domba jalu umur sataunan, kabeh ulah aya cacadna naon-naon.

²⁰Kurban kadaharanana kudu make tipung anu diadonan ku minyak jetun, reana: Pikeun tiap sapi tilu kilo, pikeun domba jalu dua kilo,

²¹pikeun tiap domba sakilo.

²²Kudu jeung kurban pamupus dosa, nya eta hiji embe badot, pikeun nyirnakeun dosa jalma rea.

²³Eta kurban-kurban teh jadi panambah kana kurban beuleuman anu saban isuk tea.

²⁴Jeung salila tujuh poe eta kudu ngahaturkeun kurban kadaharan baris aangseuan anu matak sedep ka PANGERAN, keur panambah kana kurban beuleuman jeung kurban anggur anu sapopoe.

²⁵Dina katujuh poena kudu ngadegkeun deui kumpulan ngabakti sarta henteu meunang digarawe.

²⁶Dina Pesta Panen poe kahiji, bari nyanggakeun gandum anyar ka PANGERAN, maraneh kudu ngadegkeun kumpulan ngabakti jeung teu meunang digarawe.

²⁷Poe eta kudu nyanggakeun kurban beuleuman pikeun aangseuan anu matak sedep ka PANGERAN, nya eta: dua sapi jalu ngora, hiji domba jalu, jeung tujuh anak domba jalu anu umur sataunan, kabeh ulah aya cacadna naon-naon.

²⁸Kudu make kurban kadaharan tina tipung anu diadonan ku minyak jetun, reana: Pikeun tiap sapi tilu kilo, pikeun tiap domba dua kilo,

²⁹pikeun tiap anak domba sakilo.

³⁰Jeung kudu make kurban dosa pikeun nyirnakeun dosa jalma rea, hiji embe badot. Ku cara kitu maraneh ngajalankeun upacara mupus dosa umat.

³¹Eta kurban-kurban jeung kurban cianggurna jadi panambah kana kurban beuleuman jeung kurban kadaharan anu sapopoe.