Read Boros Dusun BILANGAN 30 Bible Online

BILANGAN 30 - Boros Dusun bible

BILANGAN 30

¹Musa ngumumkeun ieu parentah-parentah pikeun para kapala kaom-kaom Israil:

²Upama aya anu kaluar nadar seja barang sanggakeun ka PANGERAN, atawa sumpah turun pacaduan, sagala anu diikrarkeunana teu meunang dicabut deui, kudu ditekanan.

³Budak parawan anu cicing di bapana keneh, lamun nyieun panadaran seja barang sanggakeun ka PANGERAN, atawa sumpah turun pacaduan,

⁴sagala anu diikrarkeun dina panadaranana kitu deui sumpah pacaduanana kudu ditekanan, kajaba lamun bapana ngadengeeun seug henteu panujueun.

⁵Lamun bapana sanggeus nyahoeun seug henteu nyatujuan kana panadaranana, eta panadaranana henteu kudu ditekanan, sarta ku PANGERAN ge baris dihampura lantaran bapana henteu satuju.

⁶Awewe anu keur tacan kawinna ngucapkeun panadaran, boh niat enya-enya boh sambarangan kitu bae, atawa sumpah turun pacaduan, geus kitu heug kawin,

⁷sagala anu diikrarkeun dina panadaranana kitu deui sumpah pacaduanana kudu ditekanan, kajaba lamun salakina sanggeus ngadenge hal eta henteu satujueun.

⁸Lamun salakina sanggeus ngadenge hal eta henteu satujueun, henteu kudu ditekanan, sarta ku PANGERAN ge baris dihampura.

⁹Randa atawa awewe anu geus ditalak, sagala anu diikrarkeun dina panadaranana atawa sumpah pacaduanana kudu ditekanan.

¹⁰Awewe anu boga salaki seug boga panadaran atawa sumpah turun pacaduan,

¹¹kudu nekanan sagala anu diikrarkeun dina panadaranana atawa sumpah pacaduanana, kajaba lamun salakina sanggeus nyahoeun hal eta henteu nyatujuan.

¹²Lamun salakina sanggeus nyahoeun seug henteu nyatujuan kana panadaranana, henteu kudu ditedunan. Ku PANGERAN ge bakal dihampura, lantaran dicegah ku salakina.

¹³Salakina boga hak neguhkeun atawa ngabatalkeun panadaranana atawa sumpah pacaduanana.

¹⁴Tapi upama sanggeus ngadengeeun panadaranana henteu terus ngalarang naon-naon, eta panadaran atawa sumpah pacaduanana teh kudu ditedunan. Upama salakina dina poean ngadenge eta panadaran teh henteu terus ngalarang, eta sarua jeung nguatkeun panadaran pamajikanana.

¹⁵Tapi upama saterusna salakina teh ngabatalkeun panadaran pamajikanana, balukarna baris keuna ka salakina, lantaran geus ngabatalkeun eta panadaran.

¹⁶Kitu pikukuh ti PANGERAN anu diandikakeun ka Musa ngeunaan panadaran-panadaran anu diucapkeun ku awewe anu can boga salaki anu cicing di bapana keneh, kitu deui pikeun awewe anu geus boga salaki.