Read Boros Dusun BILANGAN 32 Bible Online

BILANGAN 32 - Boros Dusun bible

BILANGAN 32

¹Kaom Rubin jeung kaom Gad boga ingon-ingon kacida lobana. Barang narenjo tanah Yaser jeung tanah Gilad kacida alusna pikeun ingon-ingon,

²tuluy ngadareuheus ka Musa, Elasar jeung para kapala lianna, sarta arunjukan,

³”Nun, ieu wewengkon parantos kacepeng ku urang Israil berkah pitulung PANGERAN. Tanah-tanah Atarot, Dibon, Yaser, Nimra, Hesbon, Elale, Sibma, Nebo sareng Beon, kalintang saena kangge ingon-ingon. Ku margi abdi-abdi gaduh ingon-ingon sakitu seueurna,

⁵manawi karujukan ieu wewengkon bade disuhunkeun jadi tanah milik. Sareng abdi-abdi mugi ulah dipiwarang nyicingan wewengkon peuntaseun Walungan Yordan.”

⁶Ku Musa diwaler, ”Baruk harayang cicing di dieu, arek tarega ka papada urang Israil nu maraju perang?

⁷Warani nya maraneh ngaleuleutik hate urang Israil sina ulah mareuntasan Walungan Yordan ka tanah anu geus diajangkeun ku PANGERAN?

⁸Nya kitu kalakuan kolot-kolot maraneh oge basa ku kami diutus ti Kades Barnea nalengteng kaayaan eta tanah.

⁹Sanggeus daratang ka Lebak Eskol tanah teh ku maranehna diilik-ilik. Tapi ari geus marulang bet ngaleuleutik hate jalma rea, nyaram asup ka eta tanah anu geus dipaparinkeun ku PANGERAN.

¹⁰Temahna PANGERAN wera nepi ka nimbalan kieu:

¹¹’Kami sumpah, ku sabab maranehna henteu junun satuhuna ka Kami, mana sakur anu budal ti Mesir, anu umurna dua puluh taun atawa leuwih, saurang ge moal aya anu asup ka tanah anu ku Kami geus dijangjikeun ka Ibrahim, Ishak, jeung Yakub.’

¹²Keunana ka sarerea, ka unggal jelema, kajaba Kaleb bin Yepune urang Kenas jeung Yosua bin Nun. Ieu mah duaan junun satuhu ka PANGERAN.

¹³Ku sabab PANGERAN wera, urang Israil disina kukulibekan di tanah gurun opat puluh taun, nepi ka jelema-jelema anu geus ngajengkelkeun manah-Na paraeh kabeh.

¹⁴Ayeuna bet maraneh, jalma-jalma doraka jaman kiwari, nurutan kagorengan kolot-kolot, rek nyieun deui bebendu PANGERAN ka urang Israil.

¹⁵Lamun maraneh, urang Rubin jeung urang Gad, rek teu narurut ka Mantenna nepi ka sakumna bangsa Israil ku Mantenna ditilarkeun deui di tanah gurun nepi ka balahi, maraneh anu kudu tanggung jawab.”

¹⁶Eta jelema-jelema ngised marekna ka Musa, arunjukan deui, ”Asal diwidian ngadamel karapyak bae heula kanggo ingon-ingon sareng ngabenteng kampung-kampung kanggo barudak.

¹⁷Saparantos kitu, seja pisan ngiring sareng sasami urang Israil majeng perang, seja tarung pangpayunna dugi ka eta tanah kajabel sareng kacicingan ku dulur-dulur. Sabot abdi-abdi perang, barudak kedah matuh heula di tempat anu parantos dibenteng, supados aman tina gangguan urang dieu.

¹⁸Samemeh dulur-dulur sabangsa Israil tiasa ngarebut eta tanah anu parantos ditangtoskeun pikeun aranjeunna, abdi-abdi moal waka marulang.

¹⁹Abdi sadaya moal ngiring ngagaduh-gaduh tanah peuntaseun Walungan Yordan, da parantos garaduh di dieu di wetaneunana.”

²⁰Waler Musa, ”Upama bener kitu, tembongkeun ayeuna di payuneun PANGERAN yen maraneh sadia maju perang.

²¹Kabeh prajurit maraneh sina mareuntasan Walungan Yordan. Dibawah aturan PANGERAN pek ka ditu gempur musuh urang nepi ka musuh taluk ka Mantenna,

²²nepi ka tanah milikna karebut. Upama geus kitu hutang jangji maraneh ka PANGERAN jeung ka papada urang Israil lunas, kakara maraneh meunang mulang. Ti dinya ieu tanah wetaneun Walungan Yordan bakal disahkeun jadi tanah milik maraneh.

²³Sabalikna lamun maraneh jalir jangji, bapa ngingetan yen eta teh dosa ka PANGERAN. Ulah nyieun kasalahan, sabab lamun nepi ka dosa tan wande maraneh meunang siksa!

²⁴Ayeuna heug bisi rek ngadegkeun pakampungan jeung nyarieun karapyak mah. Tapi jangji kudu ditedunan!”

²⁵Jawab urang Gad jeung urang Rubin, ”Seja diestokeun.

²⁶Pun bojo, barudak, sareng ingon-ingon sina di darieu di Gilad.

²⁷Abdi-abdi sadaya majeng jurit dibawah PANGERAN, seja perang meuntasan Walungan Yordan ngestokeun pilahir Bapa.”

²⁸Geus kitu Musa ngalahir ka Elasar, ka Yosua, jeung ka para kapala lianna,

²⁹”Upama enya urang Gad jeung urang Rubin mareuntasan Walungan Yordan maju perang dibawah PANGERAN, sarta upama maraneh bisa ngarebut eta tanah karana dibantu ku maranehna, bikeun tanah Gilad ka maranehna jadi tanah milikna.

³⁰Tapi upama maranehna henteu marilu meuntas, henteu milu maju perang mantuan maraneh, engke bere tanah milik di Kanaan bae sakumaha halna maraneh.”

³¹Ceuk urang Gad jeung urang Rubin, ”Bapa, abdi sadaya sumeja tumut kana timbalan PANGERAN.

³²Dibawah Mantenna abdi-abdi sumeja mareuntas muru perang ka tanah Kanaan. Teu aya sanes mung supados tiasa mageuhan tanah anu ieu, wetaneun Walungan Yordan.”

³³Ti dinya kaom Gad, kaom Rubin, jeung kaom Menase anu saparona, ku Musa diajangan sakuliah wewengkon karajaan Raja Sihon urang Emor jeung wewengkon karajaan Raja Og urang Basan, ngawengku desa-desa jeung kampung-kampung sakurilingna.

³⁴Kaom Gad ngomean deui kuta-kuta kota Dibon, Atarot, Arur,

³⁵Atrot Sopan, Yaser, Yogbeha,

³⁶Bet Nimra, jeung Bet Haran.

³⁷Urang Rubin ngomean kota-kota Hesbon, Elale, Kiryataim,

³⁸Nebo, Baal Meon (ieu ngaran meunang ngarobah), jeung Sibma. Kabeh ngaran-ngaran kota sanggeus anggeus diadegkeun deui diganti.

³⁹Kaom Mahir bin Menase ngarurug tanah Gilad nepi ka bisa kaandih. Urang Emor anu maratuh di dinya disingkirkeun.

⁴⁰Nya tuluy kaom Mahir ku Musa dipaparin tanah Gilad, seug maratuh di dinya.

⁴¹Yair, putra Menase keneh, ngarebut sababaraha desa, terus dingaranan ”Desa-desa Yair”.

⁴²Nobah ngarurug jeung ngarebut Kenat jeung desa-desana seug eta tempat-tempat dingaranan Nobah, ngalap ngaranna sorangan.