Read Boros Dusun BILANGAN 8 Bible Online

BILANGAN 8 - Boros Dusun bible

BILANGAN 8

¹PANGERAN ngandika deui ka Musa,

²”Bejakeun ka Harun, lampu-lampu teh pasang dina ajugna, atur supaya caangna ka beulah hareup.”

³Seug lampu-lampu teh ku Harun disanghareupkeun kana ajugna.

⁴Eta ajug lampu ti puhu nepi ka congona mangrupa emas ketokan, direkana nurutkeun conto anu ku PANGERAN ditembongkeun ka Musa tea.

⁵PANGERAN ngandika deui ka Musa,

⁶”Jelema-jelema urang Lewi kudu dipetel ti urang Israil lianna tuluy sucikeun.

⁷Kieu aturanana: Kepretan ku cai suci, tuluy sina ngerik bulu awakna jeung sina nyareuseuhan pakean. Sanggeus kitu maranehna jadi beresih.

⁸Tuluy sina nyarerenkeun hiji sapi jalu anu ngora keneh jeung tipung anu diadonan ku minyak jetun keur kurban kadaharan; ari maneh kudu nyokot hiji sapi jalu keur kurban dosa.

⁹Ti dinya bangsa Israil kumpulkeun, urang Lewi sina narangtung hareupeun Kemah Kami.

¹⁰Urang Israil sina narumpangkeun leungeunna kana sirah urang Lewi.

¹¹Tuluy sanggakeun eta jelema-jelema ka Kami, ku Harun, jadi pangbakti ti urang Israil ka Kami, pikeun ngajalankeun gawe ti Kami.

¹²Geus kitu urang Lewi sina narumpangkeun leungeun kana sirah dua sapi tea; sapina peuncit, hiji keur kurban dosa, hiji keur kurban beuleuman, pikeun sarat nyucikeun urang Lewi.

¹³Urang Lewi kudu dihususkeun pikeun Kami, sarta kudu dititah ngalalayanan Harun jeung anak-anakna.

¹⁴Kitu petana urang Lewi dipetel ti urang Israil lianna keur Kami.

¹⁵Sanggeus ku maneh disucikeun, urang Lewi manjing sarat pikeun ngajalankeun gawe di Kemah Kami.

¹⁶Maranehna ku Kami dijieun gaganti anak cikal di sakumna bangsa Israil, jadi hak milik Kami pribadi.

¹⁷Basa Kami di Mesir maehan sakabeh cikal lalaki, cikal-cikal urang Israil kitu deui cikal-cikal ingon-ingon ku Kami dijadikeun hak milik.

¹⁸Ayeuna Kami nyandak urang Lewi pikeun gaganti sakabeh cikal lalaki urang Israil.

¹⁹Maranehna ku Kami diserenkeun ka Harun jeung anak-anakna jadi pangbakti ti urang Israil, pikeun digarawekeun di Kemah Kami, nalangan bangsa Israil, pikeun nyegah sangkan urang Israil ulah cilaka lamun deukeut-deukeut ka ieu Kamar Suci.”

²⁰Seug urang Lewi teh ku Musa, ku Harun, jeung ku bangsa Israil dibaktikeun sakumaha timbalan PANGERAN ka Musa.

²¹Urang Lewi kabeh susuci, nyareuseuhan pakean, tuluy ku Harun disanggakeun ka PANGERAN sarta disucikeun sakumaha mistina.

²²Sagala rupa timbalan PANGERAN ka Musa perkara urang Lewi ku sakumna bangsa Israil dilampahkeun. Sakabeh urang Lewi enggeus manjing sarat pikeun ngajalankeun gawe di Kemah PANGERAN, dikapalaan ku Harun jeung putra-putrana.

²³PANGERAN ngandika deui ka Musa,

²⁴”Sakur urang Lewi ti semet umur dua puluh taun wajib digawe di Kemah Kami,

²⁵eureun-eureun sanggeus umur lima puluh taun.

²⁶Sanggeusing kitu ari daek mah ngabantuan gawe ka baturna heug bae, tapi lain ku karana wajib. Kitu pikukuhna hal kawajiban urang Lewi.”