Read Boros Dusun NAHUM 2 Bible Online

NAHUM 2 - Boros Dusun bible

NAHUM 2

¹Eh Ninewe, maneh bakal ditarajang! Kakuatan nu bakal nyasaak maneh tereh datang. Jaga benteng-benteng pertahanan! Awaskeun jalan! Taki-taki pikeun perang! (

²PANGERAN geus mimiti rek mulihkeun deui Israil cara samemeh dijarah ku musuh.)

³Balad musuh marawa tameng beureum, dangdananana ge warna beureum. Keur sasadiaan rek narajang! Kareta-karetana semu hurung kawas seuneu, kudana patinglalunjuk.

⁴Kareta perang rarikat tinggurudug di jalan-jalan, balawiri mundar-mandir di alun-alun, tinggalebur jiga obor, terus tingsalemprung sakilat-sakilat.

⁵Para perwira dipanggil maju, tuluy maraju bari titatarajong. Nyebrut maruru kana kuta, tuluy marasang panggedor.

⁶Lawang-lawang kota sisi walungan, rarebah bedah, eusi karaton guyur-tagiwur.

⁷Ratu geus beunang ditangkep, para emban ngagarukguk kawas sora japati, bari ngaramesan harigu.

⁸Lir cai bedah bendunganana, jalma-jalma ngaburudul kalaluar ti Ninewe. ”Areureun! Areureun!” ceuk nu marentah. Tapi euweuh nu balik deui.

⁹Jarah perakna! Jarah emasna! Ieu nagri loba pependemanana!

¹⁰Ninewe geus ancur, rehe, combrek! Hate lelenyapan ku kasieun. Tuur nyorodcod leuleus, tanaga musna. Beungeut-beungeut sarepa.

¹¹Ayeuna mana eta kota nu asalna lir guha singa, tempat anak-anak singa diparaban tempat indit singa jalu jeung singa bikang, sarta anak-anakna aman di dinya?

¹²Singa jaluna nekukan mangsa, geus katekuk disasaak, keur bikangna jeung anakna, guhana pinuh ku daging beunang nyasaak.

¹³”Ieu Kami, musuh maneh!” dawuhan PANGERAN Nu Maha Kawasa. ”Kareta-kareta perang maneh ku Kami arek didurukan nepi ka beak. Serdadu-serdadu maneh bakal paraeh di medan perang. Harta banda maneh beunang rarampas ti nu sejen, ku Kami baris dijabel. Pepentaan-pepentaan para utusan maneh moal kadenge-denge deui.”