Read Boros Dusun MATEUS 15 Bible Online

MATEUS 15 - Boros Dusun bible

MATEUS 15

¹Aya rombongan urang Parisi jeung guru-guru agama ti Yerusalem, naranya kieu ka Yesus,

²”Ku naon murid-murid Anjeun henteu marake adat karuhun urang? Ari rek dalahar tara ngarumbah leungeun heula nurutkeun aturan!”

³Waler Yesus, ”Sabalikna aranjeun anu mentingkeun adat karuhun, ku naon ngarempak parentah Allah?

⁴Timbalan Allah, ʼManeh kudu hormat ka indung bapa.ʼ Jeung, ʼAnu ngagogoreng indung bapa kudu dipaehan.ʼ

⁵Tapi ceuk pangajaran aranjeun mah, lamun jelema boga bikeuneun ka bapana atawa ka indungna, tapi nyebutkeun yen, ʼAnu ku kuring rek dibikeun ka Bapa jeung Ema teh ku kuring geus dihaturkeun ka Allah,ʼ

⁶eta jalma geus teu perlu deui ngahormat ka kolotna. Ku cara kitu teh aranjeun nyumahkeun parentah Allah, nurutkeun pangajaran sorangan.

⁷Aranjeun teh munapek! Cocog jeung ramalan Yesaya ngeunaan aranjeun, anu kieu tea:

⁸ʼIeu jelema-jelema, dawuhan Allah, hormatna ka Kami ngan semet omonganana, hatena mah jauh ti Kami.

⁹Cumah bae ibadah ka Kami, sabab ngajarkeun aturan beunang manusa, anu dianggapna aturan ti Kami!ʼ ”

¹⁰Geus kitu Yesus miwarang jalma rea kumpul, tuluy saur-Na, ”Darengekeun, halartikeun!

¹¹Anu ngalantarankeun diri jadi najis teh lain anu asup kana sungut, tapi anu kaluar ti dinya.”

¹²Ti dinya murid-murid-Na nyalampeurkeun, unjukan, ”Bapa, uninga urang Parisi nyarerieun hate ku kasauran Bapa tadi?”

¹³Waler Yesus, ”Pepelakan anu lain beunang melak Rama Kami nu di sawarga, kabeh bakal dirabut.

¹⁴Teu kudu risi ku urang Parisi! Pamingpin-pamingpin lolong kabehanana. Nu lolong nungtun nu lolong, tangtu duanana tiguling kana solokan.”

¹⁵Petrus miunjuk, ”Dupi pilahir nu tadi naon hartosna?”

¹⁶Waler Yesus, ”Ari maneh, geuning teu leuwih pinter ti batur.

¹⁷Piraku teu ngarti, yen nu asup kana sungut terusna ka jero beuteung, ti dinya kaluar deui.

¹⁸Sabalikna anu kaluar tina sungut asalna ti jero hate, matak najis kana diri.

¹⁹Sabab timbulna pikiran-pikiran jahat teh ti jero hate, ngalantarankeun jelema nepi ka maehan, ngaranyed jeung nyieun kalakuan-kalakuan anu ingkar tina susila, maling, merdaya, jeung mitenah batur.

²⁰Eta kabeh matak najis kana diri. Ari dahar teu ngumbah heula leungeun mah sanajan ceuk urang Parisi kudu, teu matak najis diri.”

²¹Yesus angkat ti dinya ka hiji daerah deukeut Tirus jeung Sidon.

²²Aya hiji awewe urang Kanaan anu cicing di dinya, ngadeuheus ka Anjeunna sarta sasambat kieu, ”Nun Putra Daud, abdi nyuhunkeun piwelas! Pun anak awewe diraksuk ku roh jahat, awakna dugi ka reksak.”

²³Ku Yesus teu diwaler sakecap-kecap acan. Murid-murid-Na mihatur, ”Sina nyingkah, Pa! Ti tadi nutur-nutur bae, sareng gandeng!”

²⁴Saur Yesus, ”Kami diutus teh ngan ka urang Israil, hususna ka anu salasar cara domba leungit.”

²⁵Bruk eta awewe teh nyuuh kana sampean Anjeunna. ”Tulungan, Juragan!” sasambatna.

²⁶Saur Yesus, ”Salah nyokot kadaharan barudak tuluy dialungkeun ka anjing.”

²⁷”Leres kitu, Juragan,” tembalna. ”Nanging geuning anjing oge kenging ngaletakan sesa-sesa anu ragragan tina meja dununganana.”

²⁸Geus kitu waler Yesus, ”Ibu, iman kapercayaan Ibu sakitu mantepna! Heug, panuhun Ibu sing laksana.” Sapada harita keneh anakna cageur.

²⁹Ti eta tempat Yesus angkat deui mapay Talaga Galilea, tuluy unggah ka hiji pasir ngadon calik.

³⁰Jalma-jalma ngabrul daratang ka Anjeunna, mawa nu lumpuh, nu lolong, nu cingked, nu pireu, jeung nu garering ku kasakit sejen, dikumpulkeun deukeut sampean Yesus, seug ku Anjeunna dicalageurkeun.

³¹Jelema-jelema mani arolohok nenjo anu pireu jadi bisa ngomong, anu cingked jadi walagri, anu lumpuh jadi bisa leumpang, anu lolong jadi bisa nenjo. Seug bae maruji ka Allah urang Israil.

³²Yesus nyaur murid-murid tuluy nyarios, ”Karunya ieu jelema-jelema teh. Geus tilu poe di darieu jeung Kami, ayeuna geus henteu barogaeun jang dahar. Kami teu tega nitah baralik teu disina dalahar heula, bisi kalempohan di jalan.”

³³Piunjuk murid-murid, ”Nanging di gurun keusik sapertos kieu, ti mana bade kenging tedaeun kangge jalmi sakitu seueurna?”

³⁴”Sabaraha roti nu maraneh?” Yesus mariksa. ”Tujuh, sareng lauk saeutik,” tembal murid-murid.

³⁵Jelema-jelema ku Yesus dipiwarang dariuk dina taneuh.

³⁶Roti jeung lauk ku Anjeunna dicepeng tuluy Anjeunna muji sukur ka Allah. Roti disemplekan tuluy diserenkeun ka murid-murid sina dibagikeun.

³⁷Jelema-jelema dalahar nepi ka sareubeuheun. Rotina nyesa, ku murid-murid dikumpulkeun meunang tujuh karanjang.

³⁸Anu disuguh dahar harita lalaki wungkul aya opat rebu urang, jaba awewe jeung barudak.

³⁹Sanggeus dalahar ku Yesus dipiwarang baralik, ari Anjeunna terus kana parahu ngabujeng daerah Magadan.